Եվրոպան նշում է նացիստների դեմ հաղթանակի 70-ամյակը

Ողջ Եվրոպայում սկսվում են միջոցառումները` նվիրված եվրոպական մայրցամաքում ամենաարյունալի պատերազմի ավարտի 70-ամյակին: Այսօր Լոնդոնի կենտրոնում Կենոտաֆ հուշարձանի մոտ մեկ րոպե լռությամբ կհիշեն այն պահը, երբ 1945 թվականի մայիսի 8-ին Ուինսթոն Չերչիլը հայտարարեց Գերմանիայի դեմ պատերազմի ավարտի մասին: Այս մասին գրում է BBC-ն:

Ուրբաթ երեկոյան ողջ Բրիտանիայում կվառվեն ավելի քան 200 առափնյա փարոսներ:

Ներկայիս թագուհին, ով այն ժամանակ արքայադուստր էր, իր ծնողների՝ թագավոր Գեորգ VI-ի և թագուհի Եղիսաբեթի հետ ողջունել է համերկրացիներին Բուքինգհեմյան պալատի պատշգամբից: Կիրակի թագուհին իր ներկայությամբ կպատվի Վեսթմինսթերյան աբբայությունում գոհունակության արարողությունը:

Դրանից հետո վետերանները զինուժի ներկայացուցիչների հետ զորահանդեսի կուղևորվեն Ուայթհոլով։ Ողջ երկրով մեկ առաջիկա օրերին կկայանան հիշատակի միջոցառումներ, փողոցային տոնակատարություններ ու համերգներ:

Ամենամասշտաբայինը կլինի Լոնդոնի Սենտ Ջեյմսի այգում կայանալիք համերգը:

Ֆրանսիայոմ Հաղթանակի օրը հայտարարված է ազգային տոն։ Նախագահ Ֆրանսուա Օլանդը ծաղկեպսակ կդնի Անհայտ զինվորի գերեզմանին:

Ռուսաստանում հաղթանակի տոնը կնշվի մայիսի 9-ին` Մոսկվայի Կարմիր հրապարակում զորահանդեսով։ Արևմուտքի երկրները հրաժարվել են իրենց ներկայացուցիչներին Մոսկվա ուղարկել` ի նշան բողոքի Ուկրաինայում Ռուսաստանի գործողությունների:

Եվրոպացի 9 առաջնորդները լեհական Գդանսկ քաղաքում մասնակցել են Եվրոպայում Երկրորդ համաշխարհային պատերազմի ավարտի 70-ամյակին նվիրված միջոցառմանը: Ներկա է գտնվել նաև ՄԱԿ-ի գլխավոր քարտուղար Պան Գի Մունը:

Պան Գի Մունի խոսքով` իրենք ցանկանում են ապագա սերնդին զերծ պահել պատերազմներից, հակամարտություններից և հանցագործություններից: Նա միջազգային հանրությանը համագործակցության, ՄԱԿ-ի և ԵՄ-ի աշխատանքին աջակցելու կոչ է արել:

«Երկրորդ համաշխարհաին պատերազմն արդյունքում մեզ տվել է սկզբունքորեն նոր մեխանիզմներ` խաղաղության ապահովման համար»,- ասել է նա: