Պակիստանում ուղղաթիռի վթարի հետևանքով զոհվել են Նորվեգիայի և Ֆիլիպինների դեսպանները

Պակիստանի հյուսիս-արևելքի Գիլգիթ-Բալտիստան շրջանում ռազմական ուղղաթիռի վթարի հետևանքով զոհվել են այդ երկրում Նորվեգիայի և Ֆիլիպինների դեսպանները, ինչպես նաև Մալայզիայի և Ինդոնեզիայի դեսպանների կանայք: Ինչպես տեղեկացնում է «Արմենպրես»-ը՝ հղում անելով տեղական հեռուստատեսությանը, հաշվի առնելով վթարից տեղացի երկու օդաչուների զոհվելու վերաբերյալ ավելի վաղ ստացված տեղեկությունները, զոհերի ընդհանուր թիվը հասել է վեցի:

Ըստ առկա տեղեկատվության՝ լուրջ վնասվածքներ են ստացել նաև ուղղաթիռում գտնվող Լեհաստանի և Ռումինիայի դեսպանները:

Աղետյալ ուղղաթիռը կոշտ վայրէջք է կատարել Նալթարի հովտում՝ դպրոցի շենքի վրա: Ընդամենը ուղղաթիռում եղել են վեց պակիստանցիներ և 11 օտարերկրյա քաղաքացիներ: Վթարի հետևանքով ավիացիոն կերոսինի ուժգին բռնկում է տեղի ունեցել: Պատահարի վկաներից մեկը հայտնել է, որ կրակի է մատնվել նաև դպրոցը, որի վրա վայրէջք էր կատարել ուղղաթիռը: Նրա խոսքով շենքում երեխաներ են եղել: Ավելի վաղ հաղորդվել էր, որ դպրոցը փակ է եղել:

Ինչպես նշում է ՏԱՍՍ-ը, դիվանագետների ու լրագրողների փոխադրող երեք ուղղաթիռներ օդից ուսումնասիրում էին այդ տարածքը՝ ստուգելու անվտանգությունը Գիլգիթի նահանգի վարչական կենտրոն Պակիստանի վարչապետ Նավազ Շարիֆի այցի նախօրեին: