Քրդական կուսակցությանը ձայներ չտալու համար Թուրքիան Իրաքում ընտրատեղամասեր չի բացել

Թուրքիայում կայանալիք խորհրդարանական ընտրություններին ընդառաջ երկրի իշխանությունները շարունակում են խախտել ընտրակարգն ու գործընթացում բոլորի ներգրավման հավասարությունը: Ինչպես հաղորդում է «Արմենպրես»-ը՝ վկայակոչելով թուրքական Demokrathaber.net-ը, Իրաքի տարածքում քրդամետ կուսակցության օգտին քվեներ չգրանցելով‚ հետին մտքով որևէ ընտրատարածք չի բացվել:

Ժողովուրդների դեմոկրատական կուսակցության Շըրնաքի պատգամավոր Հասիփ Քափլանն այս առնչությամբ հայտարարություն է արել՝ ասելով, որ ընտրատեղամասեր չեն բացվել այն պատճառով, որ տեղի թուրքերը մեծամասամբ ձայները տալու էին քրդական կուսակցությանը:

Թուրքիայի բարձրագույն ընտրական հանձնաժողովն այս կապակցությամբ ավելի վաղ ներկայացրած դիմումին ի պատասխան նշվել էր, թե իբր ընտրատեղամասեր չեն բացվել, քանի որ Իրաքում Թուրքիայի քաղաքացիները քիչ են: Մինչդեռ Թուրքիայի ԱԳՆ տվյալներով՝ Իրաքում բնակվում է Թուրքիայի 125 հազար քաղաքացի: Թուրքիայի ամենաշատ քաղաքացիներ ունեցող երկրների շարքում Իրաքը հինգերորդն է՝ հաջորդելով Գերմանիային, Նիդերլանդներին, Բելգիային և Ֆրանսիային: Ուշագրավ է նաև, որ ընտրատեղամասեր բացվել են անգամ այնպիսի երկրներում, ինչպիսիք են Իռլանդիան, Թայլանդը, Հարավաֆրիկյան Հանրապետությունը, Ճապոնիան, Բահրեյնը կամ Սուդանը:

Թուրքիայում խորհրդարանական ընտրությունները կմեկնարկեն հունիսի 7-ին: Երկրի ներսում ընտրություններին կմասնակցի 53 միլիոն 765 հազար 231 մարդ, իսկ արտասահմանում՝ 2 միլիոն 867 հազար 658: Ընտրություններում ներգրավված են 20 կուսակցություն, պատգամավորության 165 անկախ թեկնածու: