Սաուդական օդանավերը ռմբակոծում են Եմենի շրջանները

Սաուդական օդանավերը մայիսի 11-ին ռմբակոծել են Ատան շրջանը և Սանայի օդանավակայանը:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, հինգ ռումբ են արձակվել նաև Եմենի կենտրոնում գտնվող պատմական բերդի, Շաբուա նահանգի Աթակ քաղաքում բանակի դիրքերի ուղղությամբ:

Տեղեկություններ կան, որ Սաադա քաղաքի Նուշուր հովտում ռազմական օդանավ է ընկել: Պարզվել է, որ օդանավը Մարոկկոյին է պատկանում, որը մասնակցել է արաբական դաշինքի ռազմական գործողություններին:

Եմենյան ցեղախմբերը վերահսկողություն են հաստատել սաուդական Ռադիֆ լեռան վրա, ինչպես նաև առգրավել են նահանջելու ժամանակ սաուդացի սահմանապահների թողած մեծ քանակությամբ զենքերը: Ռմբակոծության է ենթարկվել սաուդական Նաջրան շրջանը: Սաուդական հեռուստալիքները ցուցադրել են ռմբակծության հասցրած վնասները:

Ավելի վաղ Եմենի օդային ուժերը հայտարարել էին, որ համաձայն են դադարեցնել կրակը, սակայն ցանկացած խախտման դեպքում իրենց պատասխանելու իրավունք են վերապահում: Իր հերթին շիական «Անսար Ալլահ» շարժման անդամները պաշտոնապես համաձայնել են փոխհամագործակցել ստեղծված իրավիճակից դուրս գալու համար:

Մայիսի 8-ին Սաուդյան Արաբիայի ԱԳ նախարար Ադել ալ Ջուբեյրը հայտարարել էր, որ Եմենում զինադադարը կսկվի մայիսի 12-ի երեկոյան և կշարունակվի հինգ օր:

Եմենի նախկին նախագահ Ալի Աբդ Ալլահ Սալեհը հայտարարել է, որ շիաների դաշնակիցը չէ, սակայն պատրաստ է դաշնակից լինել բոլոր նրանց, ովքեր պաշտպանում են Եմենը: Նա Սաուդյան Արաբիայի գործողությունները որակել է ոչնչացման գործողություններ:

ՄԱԿ-ի մարդասիրական հարցերով կոորդինատոր Յոհաննես Վան Դեր Կլաուն նշել էր, որ զինված բախումների և ռմբակոծությունների հետևանքով վեց շաբաթում ավելի քան 1400 մարդ զոհվել, ևս 6 հազարը վիրավորվել են:

Սաուդյան Արաբիայի գլխավորած «Վճռականության փոթորիկ» գործողություններն սկսվել են մարտի 26-ի գիշերը: Սաուդյան Արաբիային աջակցում են Բահրեյնը, Կատարը, Քուվեյթը և ԱՄԷ-ն: Դաշինքն ապրիլի 21-ին հայտարարել էր գործողությունների ավարտի և միաժամանակ նոր գործողություն սկսելու մասին, որը կրում է «Հույսի վերականգնում» անվանումը: