Վրաստանի՝ ՆԱՏՕ-ի անդամ դառնալը կախված է միայն նրանից և դաշինքի անդամ երկրներից. Ստոլտենբերգ

Վրաստանի՝ ՆԱՏՕ-ի անդամ դառնալը կախված է միայն Վրաստանից և դաշինքի անդամ 28 երկրներից: Այդ մասին, ինչպես տեղեկացնում է «Արմենպրես»-ը՝ հղում անելով «Գրուզիա Online»-ին հայտարարել է ՆԱՏՕ-ի գլխավոր քարտուղար Ենս Ստոլտենբերգը՝ մայիսի 11-ին Բրյուսելում ելույթ ունենալով Վրաստանի նախագահ Գեորգի Մարգվելաշվիլիի հետ համատեղ անցկացված մամուլի ասուլիսում:

Այս համատեքստում Հյուսիսատլանտյան դաշինքի գլխավոր քարտուղարն ընդգծել է, որ ուրիշ որևէ երկիր չի կարող վետո դնել այդ գործընթացի վրա կամ ինչ-որ կերպ միջամտել դրան:

«Մենք պաշտպանում ենք Վրաստանում իրականացվող բարեփոխումները գործընթացը և ընդգծում ենք իր ուղին ինքնուրույն ընտրելու յուրաքանչյուր երկրի հիմնարար իրավունքը: Այստեղ նկատի են առնվում նաև անվտանգության մեխանիզմները, անդամակցությունը ռազմական դաշինքին: Այն, թե Վրաստանը կդառնա արդյոք ՆԱՏՕ-ի անդամ, կախված է միայն Վրաստանից և դաշնակից 28 երկրներից, և ոչ մի այլ երկիր չի կարող վետո դնել այդ գործընթացի վրա կամ ինչ-որ կերպ միջամտել դրան»,- հայտարարել է ՆԱՏՕ-ի գլխավոր քարտուղարը:

Նրա գնահատմամբ՝ Վրաստանը առաջընթացի է հասնում դաշինքին ինտեգրվելու ճանապարհին: «Շարունակում ենք աշխատել այդ ուղղությամբ գոյություն ունեցող փաթեթի շրջանակներում: Վրաստանն առաջընթացի է հասնում: Մենք հավատարիմ ենք այն գործընթացին ու այն հարցերին, որոնք քննարկել ենք Ուելսում»,- հավելել է Ենս Ստոլտենբերգը: