Նեպալում աճում է նոր երկրաշարժի զոհերի ու տուժածների թիվը

Մայիսի 12-ի առավոտյան Նեպալում տեղի ունեցած 7,3 մագնիտուդով նոր երկրաշարժի զոհերի թիվը հասել է 26-ի, տեղեկացնում է «Արմենպրես»-ը՝ հղում անելով ԻԱՆՍ լրատվական գործակալությանը:

Եվս 19 զոհվածի մարմիններ հայտնաբերվել են Դոլակհա օկրուգում: Ավելի վաղ Նեպալի ոստիկանության պաշտոնական ներկայացուցիչ Քամալ Սինգհ Բանը ՏԱՍՍ-ին հայտնել էր, որ «տեղեկատվություն ունի երկրի կենտրոնական մասին Սինդհուպալչոկ շրջանում և մայրաքաղաք Կատմանդուում յոթ զոհվածների մասին»: «Եվս շուրջ 150 մարդ տուժել է»,- հավելել է նա:

Իր հերթին, Արտակարգ իրավիճակների ազգային կենտրոնը հաղորդել է 335 տուժածների մասին: «Ըստ մեր տվյալների՝ զոհվել է 16, տուժել 335 մարդ»,- նշվում է Twitter միկրոբլոգների կայքում Կենտրոնի պաշտոնական էջում:

Ցնցումներն զգացվել են նաև Հնդկաստանում, որտեղ իրենց աշխատանքը դադարեցրել են մայրաքաղաք Նյու Դելիի և Կալկաթայի մետրոպոլիտենները: Press Trust լրատվական գործակալությունը հաղորդել է Բիհար արևելյան նահանգում 10 զոհվածների մասին, որտեղ մի քանի շենք է փլվել:

Հնդկաստանի օդերևութաբանական դեպարտամենտն առաջին ցնցումից հետո գրանցել է նվազ ինտենսիվության ևս առնվազն վեց հետցնցում: Դրանց մագնիտուդը կազմել է 4,2-ից մինչև 6,2:

ԱՄՆ-ի Երկրաբանական ծառայությունն իր կայքում նշել է, որ Նեպալում նոր երկրաշարժի մագնիտուդը կազմել է 7,4: Ստորգետնյա ցնցումները գրանցվել են UTC ժամանակով ժամը 07:05-ին (Երևանի ժամանակով ժամը 11.05-ին): Երկրաշարժի էպիկենտրոնը գտնվում էր մայրաքաղաք Կատմանդուից 83 կիլոմետր արևելք ընկած շրջանում, օջախը՝ 18,5 կմ խորության վրա:

Ապրիլի 25-ին Նեպալում տեղի ունեցած ավերիչ երկրաշարժի զոհ է դարձել ավելի քան 8 հազար մարդ, տուժել են ևս շուրջ 18 հազար բնակիչներ: Ավերվել է ավելի քան 300 հազար շենք, վնասված շենքերի թիվն անցնում է 254 հազարից: