«ՆԱՏՕ-ն բաց է պահում Ռուսաստանի հետ երկխոսության պատուհանը». Ստոլտենբերգ

ՆԱՏՕ-ն աջակցում է Ռուսաստանի դեմ պատժամիջոցներին, միևնույն ժամանակ պատուհանը բաց է թողնում երկխոսության համար: Այս մասին  հայտարարել է դաշինքի գլխավոր քարտուղար Յենս Ստոլտենբերգը Թուրքիայում ՆԱՏՕ-ի ԱԳՆ ղեկավարների հանդիպման ժամանակ, գրում է ՌԻԱ Նվոստին:

«Մենք շարունակում ենք աջակցել Ռուսաստանի դեմ պատժամիջոցներին Ուկրաինայի հանդեպ նրա գործողությունների պատճառով, բայց միևնույն ժամանակ շարունակում ենք քաղաքական երկխոսության պատուհանը բաց պահել»,- հայտարարել է նա:

Ստոլտենբերգը նաև Ռուսաստանին կոչ է արել դադարել աջակցել անջատողականներին Ուկրաինայի արևելքում և իր ուժերը դուրս բերել Դոնբասից:

ՆԱՏՕ-ն Ռուսաստանի հետ գործնական քաղաքացիական և ռազմական համագործակցությունը փոխել է 2014թ. ապրիլին` ուկրաինական ճգնաժամի պատճառով: Այդ ժամանակվանից ի վեր կապերն իրականացվում են միայն Բրյուսելում Ռուսաստանի մշտական ներկայացուցչության գծով:

Ուկրաինայի և արևմտյան պետությունների ներկայացուցիչները նախկինում ևս Ռուսաստանին մեղադրել են Դոնբասում հակամարտության միջամտության համար: Մոսկվան հերքում է իր կապն Ուկրաինայի արևելքում հակամարտության հետ:

ՆԱՏՕ-ում ՌԴ մշտական ներկայացուցիչ Ալեքսանդր Գրուշկոն հայտարարել է, որ Ռուսաստանը պատրաստ է երկխոսության, եթե դաշինքի կողմից եվրոպական անվտանգության հիմնական խնդիրների վերաբերյալ լուրջ խոսակցությամբ իրական հետաքրքրվածության ազդանշաններ ստացվեն: