Կոնգրեսում հավանություն են տվել հատուկ ծառայությունների կողմից էլեկտրոնային տվյալների հավաքումը դադարեցնելու օրինագծին

ԱՄՆ-ի Կոնգրեսի Ներկայացուցիչների պալատը մայիսի 13-ին հավանություն է տվել այն օրինագծին, որը նախատեսում է Միացյալ Նահանգերի հատուկ ծառայությունների կողմից էլեկտրոնային հաղորդակցությունների տվյալների համընդհանուր հավաքման՝ ներկայիս պրակտիկայի դադարեցում: Նախաձեռնությունը պաշտպանել է 338 կոնգրեսական, 88 օրենսդիրներ դեմ են արտահայտվել, տեղեկացնում է «Արմենպրես»-ը:

Նախաձեռնության կողմնակիցները համոզված են, որ այն «լուրջ սահմանափակումներ կդնի հատուկ ծառայությունների վրա և կպաշտպանի մարդկանց մասնավոր կյանքը»:

Օրինագիծը նպատակամղված է, մասնավորապես, ԱՄՆ-ի Ազգային անվտանգության գործակալության (ԱԱԳ) կողմից, որն զբաղվում է ռադիոէլեկտրոնային հետախուզությամբ, տեղեկատվության հավաքման մի շարք մեթոդների բարենորոգմանը: Վերջինիս էլեկտրոնային լրտեսության վիթխարի ծրագրերի վերաբերյալ տեղեկատվություն էր հրապարակել գործակալության աշխատակից Էդուարդ Սնոուդենը:

Օրինագծի հանգուցային դրույթներից մեկն արգելում է տվյալների համատարած հավաքումը, ԱԱԳ-ին զրկում է հեռախոսազրույցների ընդգրկուն որսի և առնվազն հինգ տարվա ընթացքում դրանց վերաբերյալ տեղեկությունների պահպանումը:

Նման տեղեկատվության պահպանումը ենթադրվում է վստահել հենց հեռահաղորդակցական ընկերություններին: Իրենց հետաքրքրող անձի և նրա մինչև երկու զրուցակիցների խոսակցությունների մանրամասներն ԱՄՆ-ի հատուկ ծառայությունները կարող են ստանալ սոսկ հատուկ դատարանի թույլտվությամբ:

Այժմ օրինագծին պետք է հավանություն տան ամերիկացի սենատորները, որոնց թվում, վերլուծաբանների կարծիքով, կան սույն նախաձեռնության շատ քննադատներ: Եթե նախաձեռնությունն ընդունեն նաև Սենատում, ապա ԱՄՆ-ի նախագահ Բարաք Օբաման կստորագրի այն, ինչի մասին բազմիցս հայտարարել է Սպիտակ տունը, հաղորդել է ՏԱՍՍ-ը: