Ադրբեջանը ԵՄ-ի հետ ասոցացման համաձայնագիր չի ստորագրի. խորհրդարանի փոխխոսնակ

Ադրբեջանը Եվրոպական միության հետ ասոցացման համաձայնագիր չի ստորագրի: Այս մասին հայտարարել է Ադրբեջանի խորհրդարանի փոխխոսնակ Վալեհ Ալեսքերովը, գրում է trend.az-ը:

Նրա խոսքով` Եվրոպայի խորհրդի ստեղծման պահից Թուրքիան այդ կառույցի անդամ է: «Եղբայրական երկիրը ԵՄ-ի հետ ասոցացման համաձայնագիր կնքել է 1963-ի սեպտեմբերին: Այդ փաստաթուղթն ուժի մեջ է մտել 1965-ին: 40 տարի անց` 2005-ին, այդ համաձայնագիրը կրկին կրկնվել է, անցկացվել են բանակցություններ: Այդ ժամանակահատվածում ԵՄ-ի կազմում ընդգրկվել է քրիստոնեական երկիր, որը Թուրքիայից հետ է մնում բազում չափանիշներով: Սակայն Թուրքիային նույնիսկ մոտ չեն թողնում և չեն թողնի։ Թուրքիան նաև ՆԱՏՕ-ի ցանկալի գործընկերն է, քանի որ այստեղ խոսքն անվտանգության մասին է: Ինչ վերաբերում է ԵՄ-ի հետ համագործակցությանը, ապա այստեղ Թուրքիան անպիտան է դառնում: Դրա պատճառն այն է, որ երկրի բնակչությունը կազմում են թուրքերը և մուսուլմանները: Այլ պատճառ չկա»,- ասել է Ալեքսերովը:

Նրա խոսքով` Ադրբեջանի պարագայում պատճառներն այլ են։ Ադրբեջանի հետ բարդ է գործ ունենալը:

«Մենք պահանջում ենք, որ մեզ հետ հաշվի նստեն` ինչպես իրավահավասար գործընկերների հետ: Այլ կերպ հնարավոր չէ, քանի որ մենք դրա կարիքը չունենք: Ոմանք ասում են, որ Ադրբեջանը չի ցանկանում ստորագրել ԵՄ-ի հետ ասոցացման համաձայնագիր: Ճիշտ է»,- նշել է Ալեսքերովը: