Մաքքեյնը հրաժարվել է անդամակցել Ուկրաինայի նախագահին առընթեր կոնսուլտատիվ խորհրդին

Ամերիկացի սենատոր Ջոն Մաքքեյնը մերժել է Ուկրաինայի նախագահ Պյոտր Պորոշենկոյին առընթեր Բարեփոխումների կոնսուլտատիվ միջազգային խորհրդի կազմ մտնելու հրավերը, տեղեկացնում է «Արմենպրես»-ը:

Պորոշենկոյի հրամանագրի համաձայն, որը հրապարակվել է մայիսի 13-ին, Մաքքեյնն ընդգրկվել էր Խորհրդի կազմում, որի ղեկավար է դարձել Վրաստանի նախկին նախագահ Միխեիլ Սահակաշվիլին:

«Ես շոյված եմ Խորհուրդ հրավիրված լինելու պատվից, որտեղ քննարկվելու են Ուկրաինայի տարածքային ամբողջականության ու անվտանգության ապահովման և երկրի ժողովրդավարական ապագայի աջակցման ուղիները… Սակայն օտարերկրյա կառավարությունների հետ կոնգրեսականների փոխգործակցության վերաբերյալ ԱՄՆ-ի Սահմանադրության դրույթների համաձայն՝ ես հարկադրված եմ մերժել հրավերը»,- ասված է Մաքքեյնի հայտարարության մեջ, որը զետեղված է Սենատի կայքում, հաղորդել է ՌԻԱ Նովոստին:

Ինչպես հայտարարվել էր Պորոշենկոյի հրամանագրում, Խորհրդի կազմում ընդգրկվել են նաև Շվեդիայի նախկին վարչապետ և ԱԳ նախկին նախարար Կարլ Բիլդտը, Եվրախորհրդարանի արտաքին գործերի կոմիտեի ղեկավար Էլմար Բրոքը, Սլովակիայի նախկին վարչապետ Միկուլաշ Ձուրինդան, Լիտվայի նախկին վարչապետ Անդրյուս Կուբիլյուսը և ուրիշներ:

«Բարեփոխումների խորհրդատվական միջազգային խորհուրդն Ուկրաինայի նախագահին առընթեր մարմին է, որի հիմնական խնդիրը միջազգային առաջավոր փորձի հիման վրա Ուկրաինայում բարեփոխումների անցկացման վերաբերյալ առաջարկություններ և հանձնարարականներ ներկայացնելն է»,- ասված է Ուկրաինայի նախագահի հրամանագրում, հաղորդել է ՌԻԱ Նովոստին: