Արաբական երկրները և ՅՈՒՆԵՍԿՕ-ն պարտավորվել են ոչնչացումից պաշտպանել հին հուշարձանները

Արաբական երկրները ՅՈՒՆԵՍԿՕ-ի հետ համատեղ պատրաստ են ոչնչացումից և կողոպտումից պաշտպանել Մերձավոր Արևելքի մշակութային և պատմական ժառանգությունը: Ինչպես տեղեկացնում է «Արմենպրես»-ը, այս մասին հայտարարվել է մայիսի 14-ին՝ ամփոփելով Կահիրեում հնության հուշարձանների պահպանությանը նվիրված միջազգային խորհրդաժողովի արդյունքները:

Կահիրեի հռչակագրում, որն ստորագրել են Եգիպտոսը, Սաուդյան Արաբիան, Արաբական Միացյալ Էմիրությունները, Իրաքը, Հորդանանը, Քուվեյթը, Լիբանանը, Լիբիան, Սուդանը և Օմանը, նշված է, որ երկրները համաձայնություն են ձեռք բերել «մեծացնելու համագործակցությունը մշակութային արժեքների կողոպտմանը և ապօրինի շրջանառությանը հակազդելու նպատակով»:

Տարածաշրջանի երկրների առանձնահատուկ մտահոգությունն են հարուցում ծայրահեղականների գործողությունները, որոնք ամբողջ տարածաշրջանում մեթոդաբար ոչնչացնում են պատմության հուշարձանները: «Իսլամական պետություն» (ԻՊ) ծայրահեղական կազմակերպության հաշվին են ավերված անգին արտեֆակտներն Իրաքի Նիմրուդում, պայթեցված և ավերված իսլամական և քրիստոնեական սրբավայրերը Սիրիայում և Իրաքում: Ինչպես նշում է ՏԱՍՍ-ը, նախօրյակին Սիրիայի իշխանությունները համաշխարհային հանրակցությանը նախազգուշացրել են հնադարյան Պալմիրայի ոչնչացման սպառնալիքի մասին, որը ՅՈՒՆԵՍԿՕ-ի կողմից Համաշխարհային ժառանգության հուշարձան է ճանաչվել: