Մակեդոնիայի ընդդիմությունն բողոքի անժամկետ ակցիա է սկսել վարչապետի ու նրա կառավարության դեմ

Սկոպիեում մայիսի 17-ին կառավարության շենքի դիմաց բողոքի անժամկետ ակցիա է սկսվել Մակեդոնիայի վարչապետ Նիկոլա Գրուևսկու և նախարարների նրա կաբինետի դեմ, տեղեկացնում է «Արմենպրես»-ը: Ցույցի կազմակերպիչը Մակեդոնիայի սոցիալ-դեմոկրատական միությունն (ՄՍԴՄ) է՝ Զորան Զաևի գլխավորությամբ, որը պահ անջել է վարչապետի հրաժարականը՝ նրան մեղադրելով իշխանական լիազորությունների չարաշահման բազմաթիվ դեպքերի, կոռուպցիայի և պետական միջոցների ոչ ռացիոնալ օգտագործման մեջ:

Երկրի մայրաքաղաքում հանրահավաք են անցկացրել ՄՍԴՄ-ի 20 հազար կողմնակիցներ, թեև սոցիալ-դեմոկրատների առաջնորդն ակնկալում էր, որ իրեն կաջակցի ավելի քան 100 հազար մարդ:

Ակցիայի մասնակիցները բացականչում էին հակակառավարական կարգախոսներ և թափահարում ցուցապաստառներ՝ «Մնաս բարով, Նիկոլա» մակագրությամբ: Ակցիան խաղաղ ընթացք է ունեցել, ներքին գործերի նախարարությունը խախտումների մասին չի հայտնել:

Զաևի կուսակցության կողմնակիցներից բացի, «Իլինդեն» ծառուղի, որտեղ գտնվում է նախարարների կաբինետի շենքը, ժամանել էին նաև եվրապատգամավոր Ռիչարդ Հովիտը, Եվրախորհրդարանում սոցիալ-դեմոկրատների խմբակցության փոխնախագահ Կնուտ Ֆլեկենշտայնը, ինչպես նաև Բուլղարիայի նախկին վարչապետ Սերգեյ Ստանիշևը: «Եվրոպայի պատասխանատու մոտեցումը դրսևորվում է նրանով, որ նա մի կողմ չմնա, այլ, ընդհակառակը, լսի, տեսնի ու մասնակցի»,- նշել է Հովիտը:

Հանրահավաքից հետո մի քանի հարյուր ընդդիմադիրներ վրաններ են խփել կառավարության շենքի դիմաց: Սոցիալ-դեմոկրատների մտահղացմամբ՝ այսուհետև բողոքի ակցիաներ են ընթանալու ամեն երեկո այնքան ժամանակ, քանի դեռ չի կատարվել Գրուևսկու և նախարարների նրա կաբինետի պաշտոնաթողության ընդդիմության պահանջը:

Կառավարող Ներքին մակեդոնական հեղափոխական կազմակերպության՝ Մակեդոնական ազգային միասնության դեմոկրատական կուսակցության անդամները հայտարարել են մայիսի 18-ին հակաակցիա անցկացնելու մտադրության մասին, որը, նրանց խոսքով, «պետք է ստվերի ընդդիմադիրների ելույթը և ցուցադրի ուժերի իրական դասավորությունը երկրում», հաղորդել է ՏԱՍՍ գործակալությունը: