Իրանը նշել Է նավթի արտահանման նախկին ծավալին վերադառնալու ժամկետը

Իրանը հույս ունի նավթի արտահանման նախկին ծավալին վերադառնալ արևմտյան պատժամիջոցների չեղարկումից երեք ամիս անց: Այդ մասին, ինչպես տեղեկացնում է «Արմենպրես»-ը, հայտնել է Իրանի նավթի փոխնախարար Ռոկնեդին Ջավադին: Այդպիսով, Իրանը կդառնա նավթի չորրորդ խոշորագույն արտահանողը ութերորդի փոխարեն, իսկ համաշխարհային արտահանման մեջ նրա բաժինը 5 տոկոսից կհասնի 6 տոկոսի:

«Հուսով ենք, որ կկարողանանք վերադառնալ արտահանման այն մակարդակին, որն ունեցել ենք մինչև պատժամիջոցները»,- Ջավադիի խոսքը մեջբերել է Reuters-ը: Գործակալության տվյալներով՝ փոխնախարարը հույս ունի նշված ժամկետում արտահանումը հասցնել օրական 2,5 մլն բարելի: Նա հավելել է, որ ամբողջ արտահանման կեսը կարող է բաժին հասնել Ասիային:

Այժմ Իրանը, ՕՊԷՔ-ի տվյալներով, օրական արտահանում է 1,9 մլն բարել նավթ՝ զիջելով Քուվեյթին, Կանադային (2-ական մլն), Նիգերիային (2,2 մլն), Իրաքին (2,4 մլն), Արաբական Միացյալ Էմիրություններին (2,7 մլն), Ռուսաստանին (4,7 մլն) և Սաուդյան Արաբիային (7,6 մլն): Անմշակ նավթի արտահանման համաշխարհային ծավալը կազմում է օրական 39,8 մլն բարել:

Ջավադին ենթադրում է, որ մինչև 2016 թվականի վերջը բարել նավթի գինը կհասնի մոտավորապես 80 դոլարի: «Առևտրային տեսնակյունից՝ այսօրվա գները պետք է պահպանվեն և աստիճանաբար աճեն»,- հայտարարել է Ջավադին Քուալա Լումպուրում նավթի ու գազի հարցերին նվիրված խորհրդաժողովի շրջանակներում ունեցած ելույթում:

Ավելի վաղ հաղորդվել է, որ Իրանը պատրաստ է անհապաղ անմշակ նավթի մատակարարումներ սկսել Եվրոպային, հենց որ չեղյալ հայտարարվեն արևմտյան պատժամիջոցները: Իրանական միջուկային հիմնախնդրի վերջնական կարգավորման վերաբերյալ համաձայնագիրը պետք է պատրաստ լինի մինչև հունիսի 30-ը: Ապագա փաստաթղթի պարամետրերը «վեցյակի» և Իրանի միջև համաձայնեցվել են ապրիլի սկզբին Լոզանում, հաղորդել է ՌԻԱ Նովոստին: