Սաուդյան Արաբիան ռմբակոծում է Եմենի Սաադա նահանգը

Սաուդյան Արաբիան մայիսի 19-ին ռմբակոծել է Սաադա նահանգի արվարձանները:

Ինչպես հաղորդում է «Արմենպրես»-ը' վկայակոչելով արաբական լրատվամիջոցները, արդեն տեղեկություններ են հաղորդվել Քութաֆ շրջանի ռմբակոծության հետևանքով մի քանի զոհերի մասին:

Սաուդյան Արաբիայի պաշտպանության նախարարության ներկայացուցիչ Ահմադ Ասիրին հայտարարել է, որ արաբական դաշինքը վերսկսել է ռմբակոծությունները Եմենում շիա ապստամբների' հոուսիների կողմից զինադադարը խախտելու պատճառով: Նրա խոսքով՝ հոուսիները չեն հարգել զինադադարը, ինչն իրենց ստիպել է դիմել նման քայլի:

Զինադադարից հետո օդային հարվածները կենտրոնացրել են հոուսիների հավաքատեղիների վրա, մասնավորապես Խուր Մասքարում, ալ Արիշում, Ադենի միջազագային օդանավակայանի մերձակայքում, նաև ռմբակոծվել են Սաադա նահանգի դիրքերը:

Միևնույն ժամանակ Թաազ քաղաքում թեժ մարտեր են ընթացել Եմենի նախագահ Աբդ Ռաբբո Մանսուր ալ Հադիի և հոուսիների միջև, որի հետևանքով ավելի քան 25 հոուսի է զոհվել:

Եմենում հակամարտող կողմերը զինադադարի մասին համաձայնության են եկել խաղաղ բնակիչներին մարդասիրական օգնություն տրամադրելու նպատակով: Զինադադարն ուժի մեջ է մտել մայիսի 12-ի երեկոյան և ավարտվել մայիսի 17-ին:

Եմենում իրավիճակը առավել սրվել էր 2015թ. հունվարից, երբ շիա ապստամբները գրավել էին մայրաքաղաք Սանան: Ապստամբների ճնշման տակ նախագահ Աբդ Ռաբբո Մանսուր ալ Հադին և վարչապետ Խալեդ Բախախը հրաժարական էին տվել: Որոշ ժամանակ անց նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ անց շիաների' մարտի 25-ին Ադեն մտնելուց հետո, հեռացել էր երկրից:

Նախագահը դիմել է Սաուդյան Արաբիային' խնդրելով միջամտել ստեղծված իրավիճակին: Մարտի 26-ին Սաուդյան Արաբիան Բահրեյնի, Կատարի, Քուվեյթի, ԱՄԷ-ի օդային ուժերի օգնությամբ Եմենում սկսել է «Վճռականության փոթորիկ» գործողությունը, որի ավարտից հետո սկսվել է ռազմական գործողությունների մյուս փուլը՝ «Հույսի վերականգնում»անվանումով: