Սիրիական բանակն իր դիրքերն է ամրապնդել Թադմուրում

Սիրիական բանակն ամրապնդել է իր դիրքերը հնագույն Թադմուր քաղաքի մերձակայքում:

Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, բանակը հետ է շպրտել «Իսլամական պետության» ահաբեկիչներին, ովքեր փորձել են հարձակվել քաղաքի մերձակայքում գտնվող ռազմակետի վրա:

Ռազմական աղբյուրների տեղեկացմամբ, բախումների ընթացքում մեծ թվով ահաբեկիչներ են սպանվել ու վիրավորվել, ոչնչացվել են նրանց զենքերն ու զինամթերքը, ահաբեկիչներին պատկանող յոթ մեքենաները, որտեղ նույնպես մեծ քանակությամբ զենքեր են եղել: Սիրիական օդուժը նաև հարվածներ է հասցրել ահաբեկիչներին Ամերիա գյուղի ագարակներում, ինչպես նաև Թադմուրի արևելքում գտնվող Հաջիզ Սադ բնակավայրում նրանց հավաքատեղիներին: Արդյունքում սիրիական բանակը վերահսկողություն է հաստատել Ամերիա գյուղի վրա, որը գտնվում է Թադմուրի հարավ-արևելյան հատվածում:

Աղբյուրի տեղեկացմամբ, Թադմուրի մերձակա շրջաններում ռազմական գործողությունների ընթացքում ԻՊ-ի 115 ահաբեկիչներ են սպանվել, որոնց թվում՝ երեք ղեկավար:

«Ջաբհա ան Նուսրա» և ԻՊ ահաբեկչական կազմակերպությունները մեծ կորուստներ են ունեցել Հալեպում և մերձակա գյուղերում: Ահաբեկիչների մեծ մասը սիրիական տարածք է ներխուժել թուրքական սահմանով:

Ավելի վաղ սիրիական բանակը ահաբեկիչներից մի քանի տարածքներ էր ազատագրել Լաթաքիայի հյուսիսային շրջաններում:

Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: