Իրաքի Ռամադի քաղաքից 6500-ից ավելի ընտանիք է հեռացել

Իրաքյան Ռամադի քաղաքից 6500 ընտանիքներ են հեռացել «Իսլամական պետության» ներխուժումից հետո:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, այս մասին հայտարարել է ՄԱԿ-ի գլխավոր քարտուղարի պաշտոնական ներակայացուցիչ Ֆարհան Հակը:

«Մարդասիրական գործակալությունները տեղեկացրել են, որ ավելի քան 6500 ընտանիք հեռացել են իրենց տներից, որից 3300-ից ավելին ուղևորվել է Ֆալլուջա քաղաքի ծայրամասերը, իսկ ավելի քան 2300-ը՝ Հալդիի ուղղությամբ»,- նշել է Ֆարհան Հակը՝ ավելացնելով, որ Հալդիի բժշկական աղբյուրների տեղեկացմամբ, մեծ թվով վիրավորներ են տեղափոխվել այնտեղ:

Հակի խոսքով՝ տեղական իշխանություններն օգնություն են խնդրել միջազգային կազմակերպություններից: Այժմ աշխատանքներ են տարվում Ռամադիի կարիքավոր բնակիչներին օգնություն հասցնելու ուղղությամբ:

Ավելի վաղ տեղեկություններ էին ստացվել, որ ազգային պաշտպանական ջոկատների երեք հազար զինվորներ միացել են իրաքյան ուժերին՝ Ռամադի քաղաքի ազատագրման գործողություններին մասնակցելու համար:

«Իսլամական պետության» ահաբեկիչները մայիսի 17-ին գրավել են Իրաքի Ռամադի քաղաքը: Քաղաքն ահաբեկիչների ձեռքում էր հայտնվել այն բանից հետո, երբ կառավարական ուժերը հեռացել են բնակելի տարածքներից: Բռնությունների զոհ է դարձել 503 մարդ, որոնց մեծամասնությունը կանայք ու երեխաներ են:

Մայիսի 15-ին ԻՊ-ի ահաբեկիչները լայնածավալ ռազմական գործողություններ են սկսել Ռամադի քաղաքի գրավման համար: