Դատարանը թույլ է տվել YouTube-ին տեղադրել «Մուսուլմանների անմեղությունը» սկանդալային ֆիլմը

Հերթական նիստի ընթացքում ԱՄՆ վերաքննիչ դատարանը վճռել է, որ Google ընկերությունը չպետք է հեռացնի իսլամիստներին քննադատող «Մուսուլմանների անմեղությունը» ֆիլմը YouTube տեսածառայությունից, հաղորդում է The Wrap-ը:

Ավելի վաղ երեք դատարաններ վճռել էին ֆիլմը հեռացնելու մասին, քանի որ անգամ դրա թրեյլերը բացասական արձագանքներ է առաջացրել մուսուլման հանրության շրջանում: 2012 թվականին Եգիպտոսում, Սիրիայում և այլ երկրներում բողոքի ակցիաներ են անցկացվել ֆիլմի դեմ:

Դատարանը նոր որոշում է կայացրել դերասանուհի Սինդի Լի Գարսիայի՝ դատարան ներկայացրած դիմումի արդյունքներով, ով պահանջում էր հեռացնել իր մասնակցությամբ տեսանյութը: Դատարանը որոշել է չսկսել ֆիլմի արգելքի գործընթացը՝ հաշվի առնելով «հեղինակային իրավունքների և խոսքի ազատության սկզբունքների հետ մեկտեղ անձնական տվյալների պաշտպանությունը»:

Ավելի վաղ, սոցիալական ցանցերն աջակցել են Google-ին՝ «Մուսուլմանների անմեղությունը» տեսանյութի հարցում: