Նյու Յորքում վաճառքի է հանվել գրող Ֆրենսիս Սքոթ Ֆիցջերալդի տունը

Լոնգ Այլենդի Գրեյթ Նեքի շրջանում վաճառքի է հանվել այն տունը, որտեղ 1920-ական թվականների սկզբին ապրել է գրող Ֆրենսիս Սքոթ Ֆիցջերալդը: Վաճառքի գինը կազմում է 3 միլիոն 888 հազար 888 դոլար, տեղեկացնում է «Արմենպրես»-ը՝ հղում անելով The Wall Street Journal-ին:

Տունը կառուցվել է 1918 թվականին՝ միջերկրածովյան ոճով: Այն ունի յոթ ննջասենյակ, հարկաբաժինների մակերեսն ավելի քան 460 քառակուսի մետր է: Տունն ունի յուրօրինակ մանրամասներ, ինչպիսիք են փայտի բուխարին, կամարավոր լուսամուտները և որմնաքանդակները:

Ֆիցջերալդը և նրա կինը՝ Զելդան, այդ տանն ապրել են 1922-ից մինչև 1924 թվականը: Այնտեղ նա սկսել է գրել իր ամենահայտնի գործը՝ «Մեծն Գեթսբին» վեպը: Ինչպես կարծում են գրողի ստեղծագործության հետազոտողները, հենց Ֆիցջերալդի շփումն իր հարուստ հարևանների հետ կարող էր նրան ոգեշնչել գրելու ստեղծագործությունը:

Գրանցման գործակալը հրաժարվել է հայտնել շինության ներկայիս սեփականատերերի անունները: Հանրային գրանցումների համաձայն՝ տունը պատկանում է Լարի Գոռնին, որն այն ձեռք է բերել 2008 թվականին 4,2 միլիոն դոլարով: