Ռումինիայի Հանրային հեռուստատեսությունը թողարկել է Ցեղասպանությանը նվիրված հերթական հաղորդումը

Ռումինիայի Հանրային TVR հեռուստաընկերության Europolis/ «Եվրոպոլիս» հաղորդաշարի մեկ ժամանոց եթերը մայիսի 19-ին կրկին նվիրված է եղել Հայոց ցեղասպանությանը: Ծրագրի հեղինակ Նիկոլետա Էպուրեի /Nicoleta Epure հյուրը' ռումինահայ պատմաբան և լրագրող Էդուարդ Անտոնյանը, ռումին հեռուստադիտողին ներկայացրեց Ռումինիայում Հայոց ցեղասպանության 100-րդ տարելիցին նվիրված հիմնական միջոցառումները:

«Արմենպրես»-ի հաղորդմամբ՝ հաղորդման ընթացքում ցուցադրվեց Կատալին Սավայի /Catalin Sava ծավալուն ռեպորտաժը Սուրբ Էջմիածնից, որը ռումին լրագրողը պատրաստել էր 2015թ. մարտին «Արարատի ստորոտին» մեդիաֆորումին մասնակցության ընթացքում: Ռեպորտաժում ներկայացվում է նաև հատված սրբադասման արարողությունից, ինչպես նաև Ամենայն Հայոց կաթողիկոս Գարեգին Բ-ի հետ լրագրողների հանդիպումից:

Հաղորդման հաջորդ ռեպորտաժը (հեղինակ Մարիա Թերզյան)՝ զուգակցված Էդուարդ Անտոնյանի մեկնաբանություններով, ամփոփում էր Ռումինիայում Հայոց ցեղասպանության 100-րդ տարելիցի ապրիլյան գլխավոր միջոցառումները, մասնավորապես, ապրիլի 24-ի երեկոյան Բուխարեստի Վիկտորիա հրապարակում Հայոց ցեղասպանության տարելիցին նվիրված բազմամարդ հանրահավաքը, դրանում հայերին միացած հրեա, հույն, գնչու, հունգար փոքրամասնությունների ղեկավարների և Ռումինիայի պատգամավորների պալատի մարդու իրավունքների հանձնաժողովի նախագահ, Նիկոլաե Պաունի/Nicolae Paun ելույթները:

Ցուցադրվեցին հատվածներ ապրիլի 24-ին Ռումին Շինականի ազգային թանգարանում բացված «Հայկական պատումներ. Արարատից Ստրադա Արմենեասկա» խորագրով ցուցահանդեսից և Բուխարեստի Ռադիոյի տան դահլիճում կայացած Կոմիտասին նվիրված «Արարատից Կարպատներ» հայ-ռումինական երաժշտական երեկոյից, Անդրեա Տանասեի/Andreea Tanase ռումինահայերին նվիրված պատկերազարդ ալբոմի շնորհանդեսից: Էդուարդ Անտոնյանը ներկայացրեց նաև Հայոց ցեղասպանության թեմային ռումինական մամուլի պարբերական անդրադարձները, ինչպես նաև ՌՀՄ մասնաճյուղերում կազմակերպված հիշատակի միջոցառումները:

Տեսանյութը կարող եք դիտել այստեղ: