Կիևը լուծարել է Մոսկվայի հետ ռազմատեխնիկական համագործակցության համաձայնագիրը

Ուկրաինայի և Ռուսաստանի ռազմատեխնիկական համագործակցության համաձայնագիրը լուծարված է: Այդ մասին, ինչպես տեղեկացնում է «Արմենպրես»-ը, հայտարարել է Ուկրաինայի վառելիքի և էներգետիկայի նախարար Վլադիմիր Դեմչիշինը:

«Համաձայնագիրը լուծարված է»,- մայիսի 20-ին Կիևում նախարարների կաբինետի նիստից հետո լրագրողներին ասել է նախարարը:

Ըստ «Ինտերֆաքս»-ի՝ ավելի վաղ, բացելով կառավարության նիստը, վարչապետ Արսենի Յացենյուկը հայտարարել է, որ ՈՒկրաինայի կառավարությունը որոշում է ընդունում Ռուսաստանի հետ ռազմատեխնիկական համագործակցության համաձայնագրի գործողությունը դադարեցնելու մասին, որը կնքվել է 1993 թվականի մայիսի 26-ին:

«Ագրեսոր պետությունը վտանգ է ներկայացնում անվտանգության և տարածքային ամբողջականության համար, ուստի համաձայնագիրը լուծարվում է Ուկրաինայի նախարարների կաբինետի կողմից»,-այդ որոշումը պարզաբանել է Յացենյուկը:

Իր հերթին Ուկրաինայի նախագահ Պյոտր Պորոշենկոն BBC-ին տված հարցազրույցում հայտարարել է, որ իր երկիրը «իսկական պատերազմի» վիճակում է Ռուսաստանի հետ: «Եկեք շիտակ խոսենք. մենք անջատողականների դեմ չենք կռվում, որոնց պաշտպանում է Ռուսաստանը: Սա իսկական պատերազմ է Ռուսաստանի դեմ»,-ասել է ՈՒկրաինայի նախագահը:

Պորոշենկոն ներկայացրել է տվյալներ, որոնց համաձայն՝ Ուկրաինայի հարավ-արևելքում ուժային գործողության ընթացքում զոհվել է 1800 ուկրաինացի զինվոր, ինչպես նաև 7 հազար խաղաղ բնակիչ: «Սա աղետ է, և աղետ է ոչ միայն մայրերի, այլև ողջ երկրի համար: Աղետ է 1800 զինվոր կորցրած յուրաքանչյուր ընտանիքի համար, գրեթե 7000 քաղաքացի կորցրած յուրաքանչյուր ընտանիքի համար»,-հայտարարել է Ուկրաինայի ղեկավարը: