Չինաստանում ավելի քան մեկ միլիոն մարդ է տուժել տեղատարափ անձրևներից

Չինաստանի արևելյան, հարավային ու կենտրոնական շրջաններում ավելի քան մեկ միլիոն մարդ է տուժել տեղատարափ անձրևներից, որոնք շարունակվում են մայիսի 16-ից: Զոհվել է 15 մարդ, անհայտ կորած են համարվում յոթը: Այդ մասին, ինչպես տեղեկացնում է «Արմենպրես»-ը, մայիսի 21-ին հաղորդել է Չինաստանի կենտրոնական հեռուստատեսությունը:

Մասնավորապես, Ցզյանսիի նահանգում զոհվել է ութ մարդ, տարահանվել՝ 65 հազար բնակիչ: Ջրի հորձանքից ավերվել է 1655 տուն: Նահանգի ուղղակի տնտեսական վնասը կազմել է 450 մլն յուան (73 մլն դոլար): Մեյչուանցզյան գետի վարարումը խոշորագույնն է ճանաչվել դիտարկումների ողջ պատմության ընթացքում: Գանչժոու քաղաքում առանց էլեկտրականության է մնացել շուրջ 220 հազար տուն:

Օդերևութաբանների կանխատեսման համաձայն՝ անբարենպաստ եղանակը կշարունակվի առնվազն մինչև մայիսի 22-ը, հաղորդել է ՏԱՍՍ-ը: