Սաուդյան Արաբիան ռմբակոծել է մարդասիրական օգնությունների գրասենյակը Եմենում

Սաուդյան Արաբիան մայիսի 21-ին ռմբակոծել է Եմենի հյուսիսում գտնվող մարդասիրական օգնությունների տրամադրման գրասենյակի ուղղությամբ, հինգ զոհ և տասը վիրավոր են գրանցվել, որոնց թվում եթովպացի գաղթականներ կան:

Ինչպես հաղորդում է «Արմենպրես»-ը` վկայակոչելով արաբական լրատվամիջոցները, նաև ռմբակոծվել են Եմենա-սաուդական սահմանի մոտ գտնվող Հաջջա մարզի Միդի գյուղաքաղաքի հոուսիների դիրքերը: Տեղեկություններ կան, որ շիաները հարձակվել են սաուդական մի քանի դիրքերի վրա և գրավել:

Նախօրեին սահմանի մերձակայքում բախումների ժամանակ 15 շիա և մեկ սաուդացի սպա են զոհվել:

ՄԱԿ-ի գլխավոր քարտուղան Պան Կի Մունը հայտարարել է, որ մայիսի 28-ին Ժնևում կքննարկվի Եմենի հարցը: Նա հակամարտող կողմերին կոչ է արել մասնակցել քննարկմանը:

Եմենում իրավիճակը առավել սրվել է 2015թ. հունվարից, երբ շիա ապստամբները գրավել են մայրաքաղաք Սանան: Ապստամբների ճնշման տակ նախագահ Աբդ Ռաբբո Մանսուր ալ Հադին և վարչապետ Խալեդ Բախախն այն ժամանակ հրաժարական էին տվել: Նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ անց շիաների` մարտի 25-ին Ադեն մտնելուց հետո, հեռացել էր երկրից:

Նախագահը դիմել է Սաուդյան Արաբիային` խնդրելով միջամտել ստեղծված իրավիճակին: Մարտի 26-ին Սաուդյան Արաբիան Բահրեյնի, Կատարի, Քուվեյթի, ԱՄԷ-ի օդային ուժերի հետ համագործակցությամբ Եմենում սկսել է «Վճռականության փոթորիկ» գործողությունը, որի ավարտից հետո ձեռնարկել է ռազմական գործողությունների երկրորդ՝ «Հույսի վերականգնում» փուլին: