ԱՄՆ պետքարտուղարի օգնականը չեղյալ է հայտարարել Բաքու ծրագրած այցը

ԱՄՆ պետքարտուղարի մարդու իրավունքների գծով օգնական Թոմ Մալինովկսին վերջին պահին չեղյալ է հայտարարել քաղաքացիական հասարակության և արևմտյան ինստիտուտների շարունակվող ճնշումների մասին հարցեր քննարկելու համար անցյալ շաբաթ Բաքու ծրագրած այցը' համարելով, որ Ադրբեջանի հետ ժողովրդավարության մասին երկխոսությունն արդյունավետ չի լինելու:

Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը' նշելով, որ, փաստորեն, Վաշինգտոնը դադարեցրել է քաղաքացիական հասարակության և ժողովրդավարության վերաբերյալ Ադրբեջանի իշխանությունների հետ երկխոսությունը:

Մեկնաբանելով իրադարձությունը, Պետքարտուղարության ներկայացուցիչն ասել է. «ԱՄՆ-ը և Ադրբեջանը պայմանավորվել են նման երկխոսություն սկսել պետքարտուղարի տեղակալ Վիկտորիա Նուլանդի այս տարվա փետրվարին Բաքու կատարած այցի ժամանակ: Բայց մենք չենք կարծում, որ նման երկխոսությունը արդյունավետ կլինի ներկայիս իրավիճակում: Դա մեր գնահատականն ու որոշումն է»:

Վաշինգտոնում մի շարք դիտորդներ գտնում են, որ այցը չեղյալ հայտարարելու մասին Մալինովսկու որոշումը ճիշտ էր, քանի որ ներկայիս իրավիճակում Բաքվի հետ երկխոսությունը «անիմաստ և ձևական» է երևում:

Այդ ֆոնին որոշ դիտորդներ Բաքվում և Վաշինգտոնում նախագահ Օբամայի աշխատակազմին կոչ են անում Ադրբեջանի պաշտոնական անձանց նկատմամբ «խիստ քայլեր» կատարել, եթե ազատ չարձակվեն այդ երկրում առկա մոտ 100 քաղբանտարկյալները և չդադարեցվի մեղադրանքների արշավն այն մասին, թե իբր, ամերիկացիները Ադրբեջանում իրադրության ապակայունացում են նախապատրաստում: