Ահաբեկիչները գրավել են սիրիական Ջիսր Շուղուր քաղաքի հիվանդանոցը

«Ջաբհա ան Նուսրա» ահաբեկչական խմբավորումը կառավարական ուժերի դեմ թեժ մարտերից հետո մայիսի 22-ին վերահսկողություն է հաստատել Իդլիբի վարչական շրջանի Ջիսր Շուղուր քաղաքի հիվանդանոցի վրա:

Ինչպես հաղորդում է «Արմենպրես»-ը` վկայակոչելով արաբական լրատվամիջոցները, սիրիական բանակը նահանջել է այնտեղից, զինվորներից որոշները փախուստի են դիմել, սպանվել կամ գերի են ընկել: Տեղեկություններ կան, որ շուրջ 150 սիրիացի զինվոր թաքնվում են հիվանդանոցում այն բանից հետո, երբ մոտ մեկ ամիս առաջ քաղաքը հայտնվել է ահաբեկիչների ձեռքում:

Սիրիական բանակը երկար ժամանակ հետ է մղել ահաբեկիչներին` կանխելով նրանց հարձակումները հիվանդանոցի վրա:

Արաբական մեկ այլ աղբյուրի տեղեկացմամբ, մայիսի 21-ին Հալեպի հյուսիսում օդային ռմբակոծության հետևանքով մոտ 40 ահաբեկիչ են սպանվել: Պայթյուն է որոտացել Հալեպի հյուսիսում` աշ Շաար թաղամասում, ընդդիմադիրների ռազմական հետակետում, որտեղ ընդդիմադիրները զենքեր են պահել: Ակտիվիստների խոսքով՝ սպանված զինյալները «Ջաբհա աշ Շամիա» խմբավորման անդամենր են:

ԻՊ-ի ահաբեկիչներին հաջողվել է գրավել սիրիա-իրաքյան սահմանային «Թանֆ» անցումն այն բանից հետո, երբ կառավարական ուժերը նահանջել են այնտեղից: Ավելի վաղ իսլամիստներն իրենց ձեռքն էին վերցրել սիրիական հնագույն Թադմուր քաղաքը, ռազմական օդանավակայանը, բանտը և անվտանգության ուժերի շտաբը: