Հայ դատի ԱՄՆ հանձնախումբը Ստամբուլի «Արմեն» ճամբարի քանդումը դադարեցնելու արշավ է սկսել

Հայ դատի ԱՄՆ հանձնախումբը Թուրքիայում մինչև 1983 թվականը հայ որբերին ապաստան տված «Արմեն» ճամբարի քանդումը դադարեցնելու համար ԱՄՆ Կոնգրեսին գործի դնելու նպատակ հետապնդող արշավ է սկսել: Ինչպես հաղորդում է «Արմենպրես»-ը' վկայակոչելով հանձնախմբի կայքը, Հայ դատը ԱՄՆ-ի քաղաքացիներին կոչ է արել նամակներ հղել ԱՄՆ-ի սենատորներին և կոնգրեսականներին' խնդրելով «Արմեն» ճամբարի համար դիմել Պետքարտուղարությանը:

ԱՄՆ-ում Թուրքիայի դեսպանությանը և թուրքական կառավարությանը ևս ճնշում գործադրելու առաջարկով Հայ դատի հանձնախմբի կողմից այդ առնչությամբ տարածած հայտարարության մեջ ասվում է. «Հայ որբերի ճամբարը քանդելու շուրջ դադարն ու դրա' թուրքական մամուլի ուշադրության կենտրոնում գտնվելը ԱՄՆ կառավարությանը առիթ են տալիս պահանջել չքանդել Թուրքիայում հայկական մշակույթի և կրոնական ինքնության խորհրդանիշ հանդիսացող շենքը»:

«Ասպարեզն» իր հերթին հայտնել է, որ Թուրքիայում գործող «Նոր զարթոնք» շարժումը մայիսի 22-ի երեկոյան Ստամբուլում տպավորիչ քայլարշավ է կազմակերպել: Պոլսի Բեյօղլու թաղամասում հավաքված հարյուրավոր մարդիկ հայկական որբանոցը քանդելու դեմ զորակցող քայլարշավ են կատարել դեպի Գալաթասարայ հրապարակ: Հանրահավաքի կազմակերպիչներն իրենց ելույթներում թուրքական իշխանություններին կոչ են արել անմիջապես և առանց նախապայմանների «Արմեն» ճամբարը վերադարձնել հայ համայնքին:

«Արմեն» ճամբարում են մեծացել նաև 2007 թվականին թուրքական ազգայնական շրջանակների կողմից դավադրաբար սպանված Ստամբուլի «Ակոս» շաբաթաթերթի հայազգի խմբագրապետ Հրանտ Դինքն ու նրա կինը' Ռաքել Դինքը: Մինչև 1983 թվականը մոտ 1500 հայ որբերի ապաստան տված որբանոցի տեղում, որի քանդման աշխատանքները սկսվել են մայիսի 6-ին, թուրքական իշխանությունները ծրագրել են ժամանակակից շենքեր կառուցել: Ճամբարի քանդումը ժամանակավորապես դադարեցվել է հանրության շրջանում խիստ բողոք առաջանալու և շենքը հայ տերերին վերադարձնելու պահանջներ հնչեցվելու պատճառով: