Անջեյ Դուդան ընտրություններում հաղթելուց հետո առաջին օրն սկսել Է մետրոյի մոտ սուրճ բաժանելով

Լեհաստանում կայացած նախագահական ընտրությունների ելքահարցումների արդյունքներով հաղթած՝ «Օրենք և արդարություն» ընդդիմադիր կուսակցության թեկնածու Անջեյ Դուդան ընտրություններից հետո իր առաջին օրն սկսել է Լեհաստանի մայրաքաղաքի բնակիչներին սուրճ բաժանելով: Մետրոյի Ցենտրում կայարանի մոտ այդ ակցիայի շրջանակներում նա շփվել է քաղաքացիների հետ, տեղեկացնում է «Արմենպրես»-ը:

Նախագահական ընտրությունների՝ մայիսի 24-ին կայացած երկրորդ փուլի ընթացքում Դուդան, ելքահարցման տվյալներով՝ Լեհաստանի գործող ղեկավարից առաջ է անցել քվեների 4 տոկոսով: Դուդայի հաղթանակը հաստատում են նաև Պետական ընտրական հանձնաժողովի նախնական տվյալներն այն քվեաթերթիկների հաշվումից հետո, որոնք ստացվել են 51 տարածաշրջանային ընտրական հանձնաժողովներից 12-ից: Ընտրությունների վերջնական արդյունքները Պետական ընտրական հանձնաժողովը կամփոփի մայիսի 25-ի երեկոյան:

Ինչպես նշում է ՏԱՍՍ-ը, Դուդան պաշտոնը կստանձնի օգոստոսի 6-ին պաշտոնակալության արարողությունից հետո, քանի որ այդ օրը կավարտվեն Կոմորովսկու լիազորությունները: