Եգիպտոսում պահանջում են չեղյալ հայտարարել Էրդողանի որդուն Մուրսիի տված քաղաքացիությունը

Եգիպտոսում դատական գործ է բացվել Թուրքիայի նախագահ Ռեջեփ Թայիփ Էրդողանի որդու` Բիլալ Էրդողանի եգիպտական քաղաքացիությունը չեղյալ հայտարարելու պահանջով:

Ինչպես հաղորդում է «Արմենպրես»-ը, այս մասին հայտնում է եգիպտական «Ալ Մասրա ալ-Յոում» թերթը:

Թերթը գրել է, որ Բիլալ Էրդողանին Եգիպտոսի քաղաքացիություն է շնորհել նախկին նախագահ Մուջհամեդ Մուրսին` պաշտոնաթող արվելուց երկու ամիս առաջ: Նշվում է անգամ, թե Բիլալ Էրդողանը Եգիպտոսի որ քաղաքում, որ փողոցում և տանն է գրանցված:

Թերթը հայտնել է, որ հենց այդ անձնագրով է Բիլալ Էրդողանը կարողացել Թուրքիայից փախչել Վրաստան` 2013 թվականի դեկտեմբերի 17-25-ին այդ երկրում կոռուպցիոն սկանդալի ժամանակ, որում հոլովվել էր նաև նրա անունը:

Այդ պնդումների հետ կապված՝ թուրքական պատկան մարմինները դեռևս որևէ կերպ չեն արձագանքել:

Թերթը հայտնում է նաև, որ Բիլալ Էրդողանի եգիպտական քաղաքացիությունը չեղարկելու վերաբերյալ դատական գործը հետաձգվել է հոկտեմբերի 11-ին:

2013 թվականի դեկտեմբերի կեսերին Թուրքիան ցնցած կոռուպցիոն սկանդալից անմիջապես հետո, որով բացահայտվել էին թուրքական կառավարության անդամների, այդ թվում` այն ժամանակ Թուրքիայի վարչապետ, ներկայիս նախագահ Ռեջեփ Թայիփ Էրդողանի որդու, փեսայի և դստեր խոշոր կոռուպցիոն գործարքները, Էրդողանը հայտարարել էր, որ դրա հետևում կանգնած են ԱՄՆ-ում վտարանդի արդի իսլամի գաղափարախոս Ֆաթուլլահ Գյուլենի հետևորդները, որոնք, իբր, ցանկանում են տապալել իր կառավարությունը: Էրդողանի հանձնարարությամբ Թուրքիայի դատավորների և դատախազների գերագույն խորհրդին վերաբերվող օրենքում շտապ կատարված փոփոխությամբ քողարկվել է դեկտեմբերի 17-ին սկսված խոշոր կոռուպցիոն սկանդալի գործով հետաքննությունը, որի ընթացքում հարցաքննվել են մի շարք հայտնի գործարարներ, նախարարների որդիներ ու պետական պաշտոնյաներ, այդ թվում Բիլալ Էրդողանը: Վախենալով ձերբակալությունից՝ Բիլալ Էրդողանը դեկտեմբերի 25-ին փախել էր Վրաստան: Այդ ժամանակ դատարանը կալանավորման վճիռ էր կայացրել սկանդալին մասնակից 14 մարդկանց նկատմամբ, որոնց թվում էին ներքին գործերի և էկոնոմիկայի նախարարների որդիները, «Հալք» բանկի տնօրենը և գործարա ր Ռեզա Զարրաբը:

Էրդողանին հաջողվել էր կոծկել այդ խայտառակ սկանդալը, որից հետո աշխատանքից հեռացվել կամ ձերբակալվել էին այդ կոռուպցիոն սկանդալը բացահայտած հազարից ավելի փաստաբաններ, դատախազության և ոստիկանության աշխատակիցներ: Իրավապահ և դատական համակարգերը գյուլենականներից «մաքրելու» գործընթացը Թուրքիայում շարունակվում է մինչ օրս: