Վրաստանում նշում են Անկախության օրը

Վրաստանում մայիսի 26-ին նշում են ազգային գլխավոր տոնը՝ Անկախության օրը: Հանդիսավոր միջոցառումներ տեղի կունենան երկրի մայրաքաղաքում և խոշոր քաղաքներում: Տոնակատարությունը կազմակերպել է հատուկ հանձնախումբը՝ վարչապետ Իրակլի Ղարիբաշվիլիի գլխավորությամբ, տեղեկացնում է «Արմենպրես»-ը՝ հղում անելով Sputnik-ին:

Ավանդաբար, Վրաստանի մայրաքաղաքում գլխավոր տոնական միջոցառումները տեղի կունենան Թբիլիսիի կենտրոնում՝ Ռուսթավելիի պողոտայում և Ազատության հրապարակում:

Ռուսթավելիի պողոտայում տոնական միջոցառումները կսկսվեն ժամը 12:00-ին թատերականացված երթով: Տոնակատարության սկսվելուց մեկ ժամ անց Ազատության հրապարակում ավանդաբար պլանավորված է երդմնատվության արարողություն:

Վրաստանի կառավարությունն ընթացիկ տարում նույնպես, ինչպես և վերջին երկու տարում, որոշել է Անկախության օրը զորահանդես չանցկացնել: Այդ օրն ամենաշքեղը կլինի ավիաշոուն՝ տասնյակ ռազմական ինքնաթիռների մասնակցությամբ: Ավիացիոն շոուն կկայանա «Իրոկեզ» տիպի ուղղաթիռների, L-39 տիպի «Ալբատրոս» ինքնաթիռի, և SU-25 տիպի «Միմինո» երեք ինքնաթիռների մասնակցությամբ:

Վրացի զինվորականների հետ մեկտեղ պաշտպանության նախարարության հրավերով շքերթին կմասնակցեն ամերիկացի այն զինվորականները, որոնք, ինչպես նշել է պաշտպանության նախարար Թինա Խիդաշելին, մասնակցել են վրացի զինվորների հետ համատեղ զորավարժանքներին:

Ավելի վաղ ԱՄՆ-ի նախագահ Բարաք Օբաման Վրաստանի իշխանություններին շնորհավորել է հանրապետության Աանկախության օրվա առթիվ: Նամակում ԱՄՆ-ի նախագահն ընդգծել է, որ Վաշինգտոնը Վրաստանը ճանաչում է միջազգայնորեն ճանաչված սահմաններով: