Սաուդական օդանավերը ռմբակոծում են Եմենի քաղաքները

Սաուդյան Արաբիայի գլխավորությամբ արաբական դաշինքի օդանավերի ռմբակոծության հետևանքով մայիսի 26-ին ինը մարդ է զոհվել Թաազ քաղաքի Ջաբալ Սաբր շրջանում:

Ինչպես հաղորդում է «Արմենպրես»-ը` վկայակոչելով արաբական լրատվամիջոցները, զոհերը միևնույն ընտանիքից են, որոնց թվում երեք կին և երկու երեխա կան: Սաուդական օդանավերը ռմբակոծել են նաև Սաադա նահանգի Հասամա, Մունազալա, Մլահիզ և Բանի Սիյահ շրջանները: Մայրաքաղաք Սանայում ռմբակոծվել է Եմենի նախկին նախագահ Ալի Ադ Ալլահ Սալեհի որդու տունը, որի հետևանքով այն ավերվել է:

Արաբական աղբյուրների տեղեկացմամբ, Եմենում 16 միլիոն մարդ մնացել են առանց խմելու ջրի:

Եմենի բանակը մայիսի 26-ին հրթիռներով ու հրետանիով ռմբակոծել է եմենա-սաուդական սահմանի մոտ գտնվող Նաջրան շրջանը:

ՄԱԿ-ի ՅՈԻՆԻՍԵՖ կազմակերպության ներկայացուցիչ Էնտոնի Լեյկան տեղեկացրել է, որ Եմենի հակամարտության ընթացքում զոհվել են 135 երեխա, ևս 260-ը՝ վիրավորվել:

Եմենում իրավիճակը առավել սրվել էր 2015թ. հունվարից, երբ շիա ապստամբները գրավել էին մայրաքաղաք Սանան: Ապստամբների ճնշման տակ նախագահ Աբդ Ռաբբո Մանսուր ալ Հադին և վարչապետ Խալեդ Բախախը հրաժարական էին տվել: Որոշ ժամանակ անց նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ անց շիաների՝ մարտի 25-ին Ադեն մտնելուց հետո, հեռացել էր երկրից:

Նախագահը դիմել է Սաուդյան Արաբիային՝ խնդրելով միջամտել ստեղծված իրավիճակին: Մարտի 26-ին Սաուդյան Արաբիան Բահրեյնի, Կատարի, Քուվեյթի, ԱՄԷ-ի օդային ուժերի օգնությամբ Եմենում սկսել է «Վճռականության փոթորիկ» գործողությունը, որի ավարտից հետո սկսված ռազմական գործողությունների մյուս փուլը կոչվել է «Հույսի վերականգնում»: