Շոտլանդիայի կառավարության ղեկավարը դեմ է արտահայտվել ԵՄ-ից Մեծ Բրիտանիայի դուրս գալուն

Առաջիկա հանրաքվեի արդյունքում Եվրամիության կազմից Միացյալ Թագավորության հնարավոր դուրս գալը «հակասում է Շոտլանդիայի շահերին, որն «ամեն կերպ դիմակայելու է» իրադարձությունների նման զարգացմանը: Ինչպես տեղեկացնում է «Արմենպրես»-ը, այս հայտարարությամբ հանդես է եկել Մեծ Բրիտանիայի այս հյո ւսիսային տարածաշրջանի կառավարության ղեկավար Նիկոլա Սթերջենը:

«Մենք ձգտելու են հասնել այն բանին, որ Եվրամիությունից դուրս գալը հնարավոր լինի միայն Միացյալ Թագավորության մաս կազմող բոլոր չորս տարածաշրջանների համաձայնության դեպքում»,-նշել է Սթերջենը: «Սա անհրաժեշտ է, որպեսզի Շոտլանդիան չկարողանա դուրս գալ ԵՄ-ից՝ հակառակ իր կամքի»,-ընդգծել է նա:

Մինչդեռ Մեծ Բրիտանիայի կառավարությունն արդեն որոշել է ԵՄ-ից դուրս գալու շուրջ հանրաքվեում քվեարկողների ցուցակը: Երկրի նախարարների կաբինետի հայտարարության համաձայն՝ բոլոր ընտրողները պետք է լինեն 18-ից բարձր տարիքի և բնակվեն Մեծ Բրիտանիայի տարածքում: Բացի այդ, քվեարկել կկարողանան այն բրիտանացիները, որոնք այլ պետությունների տարածքում ապրում են 15 տարուց ոչ ավելի, ինչպես նաև Ազգերի համագործակցության անդամ երկրների՝ Ջիբրալթարի տարածքում ապրող քաղաքացիները: Եվրամիության մեջ մտնող մյուս երկրների քաղաքացիները չեն կարողանա մասնակցել հ անրաքվեին:

«Սա կարևոր որոշում է մեր երկրի համար, որը վերաբերում է Միացյալ Թագավորության ապագային: Հենց դրա համար էլ մենք կարևոր ենք համարում, որ որոշում կարողանան ընդունել բրիտանացիները, իռլանդացիները և Ազգերի համագործակցության անդամ երկրների քաղաքացիները»,- Reuters գործակալությունը մեջբերել է երկրի վարչապետ Դևիդ Քեմերոնի գրասենյակի աղբյուրի խոսքը:

Քեմերոնը դեռ մինչև մայիսի 7-ի ընտրությունները, որոնցում նա վստահ հաղթանակ է տարել, հայտարարել է, որ ԵՄ-ից Մեծ Բրիտանիայի դուրս գալու շուրջ հանրաքվե կանցկացնի 2017 թվականին, բայց չի բացառել նաև ավելի վաղ ժամկետները: Նա նաև խոստացել է հասնել Եվրամիության հետ Բրիտանիայի հարաբերությունների վերանայման:

Քեմերոնն ավելի վաղ մի շարք պահանջներ է առաջադրել Եվրամիությանը՝ ներքին միգրացիոն հսկողության և տարբեր երկրներում սոցիալական նպաստների վճարման նկատմամբ հսկողության վերականգնումից մինչև ԵՄ-ի բյուջե մուծումների համակարգի բարեփոխումը:

Ինչպես սպասվում է, օրինագիծը, որը պետք է հիմք դառնա հանրաքվեի անցկացման համար, կհրապարակվի մայիսի 28-ին հաղորդել է ՏԱՍՍ-ը: