Մեծ Բրիտանիայի թագուհին գահաճառով հանդես կգա խորհրդարանում

Մեծ Բրիտանիայի Եղիսաբեթ II թագուհին գահաճառով հանդես կգա խորհրդարանում, որը կբացի երկրի նոր գումարման գլխավոր օրենսդիր մարմնի առաջին նստաշրջանը: Այն ձեւավորվել է մայիսի 7-ին կայացած ընդհանուր ընտրությունների արդյունքում, տեղեկացնում է «Արմենպրես»-ը:

Եղիսաբեթ II-ն իր ուղերձում կներկայացնի առաջիկա խորհրդարանական տարում կառավարության գործունեության ծրագիրը: Այդ ճառը գրում են նախարարների կաբինետի անդամները, որն այնուհետեւ հաստատվում վարչապետի գրասենյակի կողմից: Թագուհին իրավունք չունի փոփոխություններ կատարել դրանում, նույնիսկ եթե նա հավանություն չի տալիս կառավարության ներկայացրած առաջարկություններին:

Գահաճառի գլխավոր կետերից մեկը կդառնա Եվրամիությանը Մեծ Բրիտանիայի հետագա անդամակցության հարցի շուրջ հանրաքվեի անցկացումը: Միացյալ Թագավորության վարչապետը եւ Պահպանողական կուսակցության առաջնորդ Դեւիդ Քեմերոնը խոստացել է իր ընտրողներին՝ վերանայել ԵՄ-ին երկրի անդամակցության պայմանները եւ հանրաքվե անցկացնել մինչեւ 2017 թվականի վերջը: Բացի այդ, ուղերձում կարծարծվեն Մեծ Բրիտանիայի համար հրատապ այնպիսի հարցեր, ինչպիսիք են ահաբեկչությանը հակազդումը, երկիր ներգաղթյալների հոսքի սահմանափակումը, Շոտլանդիայի խորհրդարանին ավելի լայն լիազորությունների տրամադրումը եւ առողջապահության համակարգի ֆինանսավորման ավելացումը:

Չնայած այն բանին, որ գահաճառը ձեւականություն է, այն կարեւորագույն նշանակություն ունի բրիտանական միապետության համար, քանի որ ընդգծում է թագուհու պատմական տեղն ու նրա գերակայությունը պետության կառուցվածքում:

Ինչպես նշում է ՏԱՍՍ-ը, այդ արարողությունը Եղիսաբեթ II-ի համար կդառնա թվով 62-րդը: 1959 եւ 1963 թվականներին նա չի հայտնվել խորհրդարանում, քանի որ հղի է եղել: Թագուհու փոխարեն այն ժամանակ ճառը, նրա թույլտվությամբ, ընթերցել է լորդ-կանցլերը՝ Լորդերի պալատի խոսնակը: