Թեքսասում և Օկլահոմայում տոռնադոյից և հեղեղումներից զոհերի թիվը հասել է 21

ԱՄՆ-ի Թեքսասի և Օկլահոմայի նահանգներում տոռնադոյի և հեղեղումների հետևանքով զոհվածների թիվը վերջին վեց օրվա ընթացքում հասել է 21-ի: Անհայտ կորած է համարվում 11 մարդ, տեղեկացնում է «Արմենպրես»-ը՝ հղում անելով CNN հեռուստաընկերությանը:

Տարերքի հարվածներից տուժած նահանգների մի շարք շրջաններում անձրևները դեռևս շարունակվում են, և գետերի ջրի մակարդակը բարձրանում է: Դա ոչ միայն դժվարացնում է փոթորկի հետևանքների վերացման աշխատանքները, այլև ավելացնում է այն մարդկանց թիվը, ովքեր հարկադրված են հեղեղման սպառնալիքի պատճառով լքել իրենց տները:

Թեքսասի Ֆորտ Ուորտ քաղաքի հարյուրավոր բնակիչների իշխանությունները հանձնարարել են ժամանակավորապես տեղափոխվել ավելի անվտանգ վայր, քանի որ մերձակայքով հոսող Բրեյզոս գետը առաջիկա գիշերը կարող է այն ամբողջությամբ հեղեղել:

Ինչպես նշվում է, տարերքը հարվածել է նաև Մեքսիկային, որտեղ զոհվել է 14 մարդ:

Թեքսասի և Օկլահոմայի հեղեղված քաղաքների իշխանությունները ձեռնպահ են մնում տարերքի պատճառած վնասի չափերի կոնկրետացումից, որի չափերը ժամ առ ժամ մեծանում են: Նշվում է, որ ավերվել են հարյուրավոր բնակելի շենքեր, տարհանվել են տասնյակ հազարավոր մարդիկ, շարքից դուրս են եկել տասնյակ կիլոմետրերի հասնող ավտոճանապարհներ: Առայժմ, ինչպես հայտարարվել է, բոլոր ուժերն ու միջոցներն ուղղվել են մարդկային նոր հնարավոր զոհերի կանխմանը և դժբախտության մեջ հայտնված մարդկանց օգնություն ցուցաբերելուն, հաղորդել է ՏԱՍՍ-ը: