Իռլանդուհին ապշած է հայից ստացած հաղորդագրությունից. 16 տարի անց նա շնորհակալություն է հայտնել (լուսանկար)

Իռլանդուհին ապշել է, երբ անծանոթը, որին նա 16 տարի առաջ նվերներով արկղ է ուղարկել, Facebook սոցցանցում գտել է իրեն, գրում է «Irish Daily Mirror»-ը:

24-ամյա Քլեր Ֆեհին ցնցվել է, երբ Արսեն Խաչատրյանից նամակ է ստացել: Տուամ քաղաքի բնակչուհին 6 տարեկանում, Սուրբ ծննդյան տոնի մանկական ակցիայի շրջանակում, Արսենին նվերներով լի արկղ է ուղարկել՝ ձեռնոց, մատիտներ, տետրեր և ատամի խոզանակ:

Արսենը Քլերին նրա նամակի լուսանկարն է ուղարկել՝ նշելով, որ ցանկանում է շնորհակալություն հայտնել առատաձեռնության և դպրոցում սովորելու տարիներին նրանից ստացած նվերի համար:

Քլերը գրել է. «Երբ ես տեսա անծանոթի հաղորդագրությունը, ենթադրեցի, որ դա սպամ է: Սակայն հետո ճանաչեցի ձեռագիրս և պարզապես չէի հավատում դրան: Ես ապշած էի, որ բոլորովին օտար մարդ պահպանել է իմ նամակը ավելի քան 15 տարի: Մենք երկար խոսեցիքն Facebook-ով և նա ասաց.«Ես ցանկանում եմ քեզ շնորհակալություն հայտնել մանկական երազանքների համար»:

Դա պարզապես ստիպում է գնահատել այն ամենն` ինչ ունես»:

Քլերը նաև ուրախ է, որ Արսենն իրեն լուսանկար է ուղարկել` կնոջ և երեխայի հետ: «Հիմա նա 27 տարեկան է, հրաշալի ընտանիք ունի և 8 ամսական դուստր: Նա տուրիստական գործակալություն ունի: Նա զարմանալի մարդ է թվում»,- նշել է իռլանդուհին` հավելելով, որ ցանկանում է կապ պահպանել հայ երիտասարդի հետ, քանի որ նրան հիմա իր ընտանիքի անդամի նման է վերաբերվում: Աղջիկը նաև հույս ունի, որ մի օր կհանդիպի նրան: