«Գազպրոմ»-ի ղեկավարը չի հավատում ադրբեջանական TAP գազային խողովակաշարի իրականացմանը

«Գազպրոմը» վստահ է, որ Եվրոպայի կախվածությունը գազից գնալով մեծանալու է, և այդ պահանջը ապահովելու գործում 10 հազար կմ շառավղով տարածաշրջանում մրցակից չունի:

Այս մասին, ինչպես հաղորդում է «Արմենպրես»-ը՝ վկայակոչելով «Ինտերֆաքսը», հայտարարել է «Գազպրոմի» ղեկավար Ալեքսեյ Միլլերը՝ Միջազգային գործարար համաժողովի տարեկան հավաքում:

«2015 թվականին «Գազպրոմը», 2014 թվականի համեմատ, կմեծացնի հեռավոր արտասահման գազի արտահանումը: Մայիսին մատակարարումները կմեծանան ավելի քան 5 տոկոսով»,- ասել է նա:

Նրա խոսքով՝ 2014 թվականի արդյունքներով, Եվրամիության կողմից գազի ներկրումների մեջ «Գազպրոմի» մասնաբաժինը կազմել է երկու երրորդը, իսկ սպառման մեջ՝ 30 տոկոսը:

Անդրադառնալով Ադրբեջանից Եվրոպա գազի փոխադրման Անդրադրիատիկ (TAP) նախագծի իրականացման հնարավորությանը՝ «Գազպրոմի» ղեկավարը նշել է, որ 4 տարի առաջ նախագծի մասնակիցները ծրագրել էին մատակարարումները սկսել 2017 թվականին:

«Այժմ խոսում են 2021 թվականի մասին, և 4 տարվա ընթացքում ամեն տարի ևս մեկ տարով այդ նախագիծը հետաձգվում է: Փորձագետներն էլ են ասում, որ տարի ավելացնելու միտումը դեռևս կշարունակվի»,- ընդգծել է Միլլերը:

Նավթի համաշխարհային գների անկման հետ կապված՝ տնտեսական ճգնաժամի մեջ գտնվող Ադրբեջանի հույսը «Շահդենիզ-2» գազային հանքահորից արդյունահանվելիք գազի համար Անդրադրիատիկ և Անդրանատոլիական (TANAP) գազատարների իրականացումն է, որոնցով նախատեսվում է ադրբեջանական գազը Թուրքիայի վրայով հասցնել Եվրոպայի հարավային սահման: Ադրբեջանն այդ նախագծերը «Բաքու-Թբիլիսի-Էրզրում» գազատարի հետ անվանում է «Հարավային հոսք»:

Ռուսաստանը 2014 թվականի դեկտեմբերի 1-ին Թուրքիայի հետ պայմանագիր է կնքել իր գազը «Թուրքական հոսք» նախագծով Սև ծովի հատակով Թուրքիա, այնտեղից էլ Եվրոպա հասցնելու համար, որը համարվում է TANAP-ի մրցակից նախագիծ: TAP-ի իրականացման հարցը դեռևս ձգձգվում է՝ բավարար քանակով ներդրումներ չկատարվելու պատճառով: