Մինչև 2030 թվականն աշխարհում անհրաժեշտ է ստեղծել 600 միլիոնից ավելի աշխատատեղ. ԱՄԿ

Մինչև 2030 թվականն աշխարհում անհրաժեշտ է ստեղծել 600 միլիոնից ավելի աշխատատեղ: Այդ մասին, ինչպես տեղեկացնում է «Արմենպրես»-ը, ասված է զեկույցում, որը Աշխատանքի միջազգային կազմակերպության (ԱՄԿ) գլխավոր խորհրդաժողովի 104-րդ նստաշրջանում ներկայացրել է նրա ղեկավար Հայ Ռայդերը:

Պայմանավորված ժողովրդագրական միտումներով՝ ամեն տարի աշխատաշուկան համալրում է 40 մլն մարդ, իսկ դա նշանակում է, որ մինչև 2030 թվականը «գլոբալ տնտեսության մեջ անհրաժեշտ կլինի ստեղծել 600 մլն աշխատատեղ», ասված է Ռայդերի «Աշխատանքի ոլորտի ապագային վերաբերող հարյուրամակի նախաձեռնություն» զեկույցում:

Ռայդերը կարծում է, որ ամենայն հավանականությամբ այդ տեղերը կստեղծվեն ծառայությունների ոլորտում, որին այսօր բաժին է ընկնում աշխարհում բոլոր զբաղված անձանց 49 տոկոսը: Ինչպես պարզ է դառնում զեկույցից, գյուղատնտեսության մեջ աշխատում է զբաղվածների 29 տոկոսը, արդյունաբերության մեջ՝ 22 տոկոսը:

Ռայդերը նշում է, որ 65-ից բարձր տարիքի բնակչության բաժինը մինչև 2040 թվականը ներկայիս 8 տոկոսից կավելանա մինչև 14 տոկոս, և անհրաժեշտ կլինի «աջակցել աշխարհում աճող թվով տարեց մարդկանց»:

Գործազրկությունն աշխարհում գերազանցել է 200 միլիոնի նշագիծը, նշվում է փաստաթղթում: Այժմ գործազուրկների թիվը 30 միլիոնով ավելի է, քան մինչև 2008 թվականի ֆինանսական ճգնաժամը:

Ինչպես նշում է ՏԱՍՍ-ը, ԱՄԿ-ի գլխավոր խորհրդաժողովի նստաշրջանին մասնակցում են այդ կազմակերպության 185 անդամ երկրների կառավարությունների, արհմիությունների և գործատուների պատվիրակությունները, ընդամենը շուրջ 4 հազար պատվիրակներ: Մինչև հունիսի 13-ը նրանք կքննարկեն զբաղվածության ընդլայնման, աշխատաշուկայի զարգացման, սոցիալական գործընկերության առաջշարժման ուղիները: