Իրանում նկարչուհին բանտարկվել է խորհրդարանականների ծաղրանկարներ անելու համար

Իրանի դատարանը երիտասարդ նկարչուհուն ավելի քան 12 տարվա բանտարկության է դատապարտել այն բանի համար, որ նա խորհրդարանականների ծաղրանկարներ է արել, որտեղ նրանք պատկերված են կենդանիների տեսքով:

Ինչպես տեղեկացնում է «Արմենպրես»-ը՝ հղում անելով Washington Post թերթին, 28-ամյա նկարչուհին՝ Անետա Մարքհադանին, ծաղրանկարներ է արել՝ խորհրդարանի քվեարկող անդամներին պատկերելով կապիկների և այլ կենդանիների տեսքով, այդ կերպ բողոքելով այն բանի դեմ, որ իշխանությունները քվեարկել են կանանց համար ծնելիության վերահսկման հնարավորությունը սահմանափակելու, ինչպես նաև հակաբեղմնավորման մի քանի միջոցների արգելման օգտին:

Ֆարքհադանին դատապարտվել է 12 տարի և 9 ամիս բանտարկության, թեև, հրատարակության մի քանի աղբյուրների տվյալներով, նմանօրինակ հանցագործության համար առավելագույն պատժաժամկետը չի կարող գերազանցել յոթուկես տարվա բանտարկությունը. այդ կապակցությամբ նկարչուհու ընտանիքը և փաստաբանը գանգատարկելու են դատավճիռը:

Ինչպես նշում է Amnesty International միջազգային իրավապաշտպան կազմակերպությունը, նկարչուհին մեղադրվում է «նկարների միջոցով խորհրդարանի անդամներին վիրավորելու» մեջ, ինչպես նաև «համակարգի դեմ քարոզչություն տարածելու» համար, հաղորդել է ՌԻԱ Նովոստին: