Մերկելը կարևորել է Ռուսաստանի հետ համագործակցության շարունակումը

Գերմանիայի կանցլեր Անգելա Մերկելն այն կարծիքին է, որ միջազգային մի շարք հարցերում անհրաժեշտ է շարունակել համագործակցությունը Ռուսաստանի հետ: «Բնականաբար, մենք պետք է և ցանկանում ենք համագործակցել ՌԴ-ի հետ,- նշել է նա գերմանական DPA լրատվական գործակալությանը տված հարցազրույցում:- Մի քանի հակամարտությունների կարգավորման հարցում, օրինակ՝ Սիրիայում, մենք չենք կարող հաջողության հասնել առանց Ռուսաստանի: Ուստի ես շփումներ եմ պահպանում Վլադիմիր Պուտինի հետ»:

Մեկնաբանելով հունիսի 7-8-ին G7-ի՝ Գերմանիայում կայանալիք գագաթնաժողովը, Մերկելն ասել է, թե «ներկայումս գագաթնաժողովին Ռուսաստանի մասնակցությունն աներևակայելի է»: «Յոթնյակը» այն պետությունների խումբն է, որոնք առաջնորդվում են ժողովրդավարական արժեքներով և օրենքի գերակայությամբ»,- ընդգծել է կանցլերը:

Ավելի վաղ Մերկելը հայտարարել է, որ G7-ի կառավարությունների ու պետությունների ղեկավարները Գերմանիայում կայանալիք գագաթնաժողովում քննարկելու են ոչ միայն «ճգնաժամային դիվանագիտությանը» վերաբերող հարցեր, այլև աշխարհի տնտեսական իրադրությունը, հակաահաբեկչական միջոցները և Էբոլա մահացու վտանգավոր տենդի դեմ պայքարը:

Կանցլերը նաև նշել է, որ գագաթնաժողովի օրակարգի գլխավոր հարցերը կդառնան սովի և աղքատության դեմ պայքարը, ինչպես նաև կլիմայի փոփոխման հիմնախնդիրը: Բացի այդ, G7-ի երկրների ղեկավարները կքննարկեն գլոբալ էկոնոմիկայի վիճակը, արդյունաբերական օբյեկտներում անվտանգության հարցերը և կանանց իրավունքները:

G7-ի պետությունների գագաթնաժողովն անցկացվելու է բավարյան Ալպերի Էլմաու դղյակում:

Յոթի խումբը կամ G7-ը տնտեսապես զարգացած երկրների միավորում է, որի մեջ մտնում են Մեծ Բրիտանիան, Գերմանիան, Իտալիան, Կանադան, ԱՄՆ-ը, Ֆրանսիան և Ճապոնիան: Հիմնական նպատակն է՝ գլոբալ քաղաքական ու սոցիալական խնդիրների լուծումներ գտնելը, հաղորդել է ՏԱՍՍ-ը: