Հարավային Կորեայում աճում է MERS կորոնավիրուսի զոհերի թիվը

Հարավային Կորեայի իշխանությունները հաստատել են ևս մեկ հիվանդի մահը, որը վարակված էր մերձավորարևելյան շնչառական համախտանիշի կորոնավիրուսով (MERS), այդպիսով զոհերի թիվը հասել է չորսի, տեղեկացնում է «Արմենպրես»-ը՝ հղում անելով Reuters գործակալությանը:

Կորոնավիրուսի առաջին երկու զոհերի վերաբերյալ տեղեկատվություն էր ստացվել հունիսի 1-ին, իսկ հունիսի 4-ին հայտնի է դարձել այդ հիվանդության պատճառով ևս մեկ մարդու՝ 76-ամյա տղամարդու մահվան մասին, որը կորոնավիրուսով վարակված հիվանդի հետ նույն պալատում է եղել:

Գործակալության տեղեկատվության համաձայն՝ հաստատվել է այդ հիվանդությամբ վարակվելու ևս հինգ դեպք, այդպիսով հիվանդության հաստատված դեպքերի քանակը հասել է 41-ի: Այն մարդկանց թիվը, որոնց կարանտին է հանձնարարված հիվանդանալու ռիսկի պատճառով, աճել է մինչև 1600:

Կորոնավիրուսի տարածումը կանխելու համար երկրում արդեն փակվել է ավելի քան 900 դպրոց:

Հունիսի 3-ին Հարավային Կորեայի կառավարությունը հայտարարել է կորոնավիրուսի դեմ պայքարի օպերատիվ խմբի ստեղծման մասին: Ենթադրվում է առանձնացնել մի շարք բուժհաստատություններ, ուր կուղարկվեն MERS վիրուսով վարակվածներին, հաղորդել է ՌԻԱ Նովոստին: