Եվրոպայի խորհուրդը Բաքվի խաղերի մասնակիցներին կոչ է արել բողոքել Ադրբեջանում բռնությունների դեմ

Ադրբեջանի մայրաքաղաքում առաջին Եվրոպական խաղերի մեկնարկին ընդառաջ ՄԱԿ մարդու իրավունքների հարցերով հատուկ զեկուցող Միշել Ֆորստը, մամուլի ազատության հարցերով ԵԱՀԿ ներկայացուցիչ Դունյա Միյատովիչը և Եվրոպայի խորհրդի մարդու իրավունքների հանձնակատար Նիլս Մուժինեկսը հատուկ հայտարարություն են տարածել՝ նշելով, որ «սպորտը չի կարող անտեսել մարդու իրավունքները»:

Ինչպես հաղորդում է «Արմենպրես»-ը, Եվրոպայի խորհրդի պաշտոնական կայքում տեղադրված հայտարարության մեջ մարդու իրավունքների հանձնակատարները հույս են հայտնել, որ հունիսի 12-ին Բաքվում մեկնարկող խաղերի մասնակից 6000 մարզիկները իրենց ձայնը կբարձրացնեն ընդդեմ Ադրբեջանում մարդու իրավունքների նահանջող իրավիճակի:

«Վերջին տարիներին և մասնավորապես 12 ամսվա ընթացքում անհամաձայնության արտահայտումը դարձել է չափազանց վտանգավոր գործ Ադրբեջանում: Մեծ թվով լրագրողներ և իրավապաշտպաններ հսկայական ճնշման տակ էին և կորցրին իրենց ազատությունը քննադատությունների հանդեպ անհանդուրժող քաղաքական համակարգի պայմաններում»,- ասվում է հայտարարության մեջ: Նրանք մասնագիտական գործունեության հետևանքով ներկայումս բանտարկված Ռասուլ Ջաֆարովի, Լեյլա Յունուսի և Խադիջա Իսմայիլովայի օրինակներով ներկայացրել են Ադրբեջանում առկա բռնաճնշումների մասշտաբները: Մարդու իրավունքների հանձնակատարները նշել են, որ բռնությունների այս ալիքը տարածվում է նաև օտարերկրացիների վրա, քանի որ շատ արտասահմանյան կազմակերպությունների ներկայացուցիչներ ևս զգացել են հետապնդումների, սպառնալիքների այն հոսքը, որն եկել է ադրբեջանական կառավարությունից:

«Ադրբեջանական կառավարությունը պաշտպանում է իր քաղաքականությունը' փաստարկներ բերելով, թե բոլոր այս դեպքերը վերաբերում են անհատների անօրինական գործողություններին: Նրանք սխալ են համարում քաղաքական շարժառիթներ տեսնելը իրավապաշտպանների ձերբակալությունների հետևում: Մենք չենք համաձայնվում նրանց հետ, քանի որ համագործակցել ենք այդ ակտիվիստների և լրագրողների հետ տարիներ շարունակ և լավ գիտենք նրանց: Նրանք շատ հեռու են հանցագործ լինելու համար»,- ասվում է հայտարարության մեջ' նշելով, որ օրենքի նորմերը գործի են դրվում բռնություններն արդարացնելու համար:

«Ժամանակն է դադարեցնել այս ամենը, և սպորտը կարող է օգնել: Նվազագույնը, մարզիկները պետք է տեղյակ լինեն այն երկրում սոցիալ-քաղաքական իրավիճակին, որտեղ մրցելու են: Նրանք կարող են բարձրաձայնել իրենց մտահոգությունները տեղի մարզիկներ մոտ և անգամ իրենց հեղինակությունն օգտագործել' աջակցելու բոլոր նրանց, ովքեր անարդարության մեջ են: Հուսով ենք' նրանք ճիշտ ընտրություն կանեն և կօգտագործեն խաղերի ոգին' օգնելու վերացնել բռնությունների միտումն այն մարդկանց հանդեպ, ովքեր մարդու իրավունքները պաշտպանելուց զատ ոչինչ չեն արել»,- նշվում է հայ տարարության եզրափակիչ մասում: