Ռումինիայի նախագահը վարչապետից պահանջել է պաշտոնաթող լինել
Աշխարհ
Ռումինիայի նախագահ Կլաուս Յոհաննիսը երկրի վարչապետ Վիկտոր Պոնտայից պահանջել է պաշտոնաթող լինել: Պատճառը կոռուպցիոն սկանդալն է, որում ներքաշված է եղել վարչապետը, տեղեկացնում է «Արմենպրես»-ը՝ հղում անելով BBC-ին:
Պոնտային կասկածում են դրամական միջոցներ լվանալու, փաստաթղթեր կեղծելու և հարկերի վճարումից խուսափելու մեջ: Երկրի դատախազությունն արդեն խորհրդարանին խնդրել է վարչապետին զրկել անձեռնմխելիությունից:
Հունիսի 5-ին վարչապետի հետ ունեցած հանդիպումից հետո Յոհաննիսը հայտարարել է, որ Ռումինիայի համար անթույլատրելի է այն իրադրությունը, երբ վարչապետի պաշտոնում մնում է մի մարդ, որին կասկածում են այդքան լուրջ իրավախախտումների մեջ:
Ինչպես նշում են հետաքննչական մարմինները, կոռուպցիոն հանցագործությունները, որոնցում կասկածում են Պոնտային, վերաբերում են 2007-2008 թվականներին, երբ նա աշխատում էր որպես Ռումինիայի Սոցիալ-դեմոկրատական կուսակցության իրավաբան:
Պոնտան ինքը դեռ մեկնաբանություններ չի արել իր հասցեին հնչած մեղադրանքների շուրջ:
Անցյալ տարվա նոյեմբերին նա պարտություն է կրել նախագահական ընտրությունների երկրորդ փուլում՝ պետության ղեկավարի պաշտոնը զիջելով Յոհաննիսին:
ՈՒՂԻՂ ԵԹԵՐ
Ամենադիտված 
Թրամփը նշել է «աշխարհի մեծագույն առաջնորդներից» երկուսի անունները
