ԱՊՀ պետական լրատվական գործակալությունների ղեկավարների խորհրդի 20-րդ նիստը գումարվում է Մինսկում

Մինսկում աշխատանքն է սկսում ԱՊՀ երկրների պետական լրատվական գործակալությունների ղեկավարների խորհրդի 20-րդ նիստը: «Արմենպրես»-ի հաղորդմամբ' ԱՊՀ տեղեկատվական խորհրդի ամենակարևոր նպատակներից մեկը տեղեկատվական գործակալությունների կողմից նոր մեդիատեխնոլոգիաների յուրացման հնարավորությունների ուսումնասիրությունն, դրանց ներդրման եղանակով միմյանց միջև փոխգո րծակցության ակտիվացումն է: Նիստի ընթացքում կամփոփվեն Հայրենական մեծ պատերազմում տարած հաղթանակի միջոցառումների լուսաբանման աշխատանքները, համատեղ իրականացված ծրագրերը:

Նիստի շրջանակներում կնախանշվեն պետական գործակալությունների միջև ֆոտոծառայության շրջանակներում համագործակցության կազմակերպման և զարգացման հեռանկարները:

ԱՊՀ երկրների պետական գործակալությունների ղեկավարների խորհուրդը 2015-2016թթ. պլանավորում է նախապատրաստել և կյանքի կոչել ծրագրեր, որոնք նվիրված կլինեն Անկախ պետությունների համագործակցության գործունեության 25-ամյակին, ինչպես նաև անդամ երկրների պատմության այլ նշանակալի իրադարձություններին:

ԱՊՀ երկրների պետական լրատվական գործակալությունների ղեկավարների խորհրդի 20-րդ նիստին մասնակցելու նպատակով Մինսկ է մեկնել նաև «Արմենպրես» լրատվական գործակալության տնօրեն Արամ Անանյանը:

Խորհրդի 19-րդ նիստն անցկացվել է Երևանում. մեկ հարկի տակ հավաքված Հայաստանի, Ռուսաստանի, Բելառուսի, Ղազախստանի, Ղրղզստանի պետական լրատվական գործակալությունների ղեկավարները քննարկել են գործակալությունների միջեւ փոխհամագործակցության ուղիները, հնարավորությունների ստեղծման, կադրերի վերապատրաստման, փորձի փոխանակման հարցեր: