ՌԴ-ն ակնկալում է, որ ԵԱՏՄ-ն աշնանը դիտորդի կարգավիճակ կստանա ՄԱԿ-ի Գլխավոր ասամբլեայում. Լավրով

Ռուսաստանն ակնկալում է, ՄԱԿ-ի Գլխավոր ասամբլեան 70-րդ նստաշրջանում, որը տեղի կունենա այս տարվա սեպտեմբերին, դիտորդի կարգավիճակ կտրամադրի Եվրասիական տնտեսական միությանը: Այդ մասին հունիսի 8-ին հայտարարել է ՌԴ-ի արտաքին գործերի նախարար Սերգեյ Լավրովը՝ ամփոփելով Բելառուսի իր պաշտոնակից Վլադիմիր Մակեյի հետ հանդիպման արդյունքները, տեղեկացնում է «Արմենպրես»-ը՝ հղում անելով ՏԱՍՍ-ին:

«Ակնկալում ենք, որ Գլխավոր ասամբլեայի 70-րդ նստաշրջանում ԵԱՏՄ-ն կստանա դիտորդի կարգավիճակ,-նշել է Լավրովը:-Մենք մեր գործընկերների հետ կոորդինացնում ենք ՄԱԿ-ում նման բանաձևի առաջադրման աշխատանքը»:

ՄԱԿ-ի Գլխավոր ասամբլեայի դիտորդի կարգավիճակ ունեցող կազմակերպությունների թվում են՝ ԱՊՀ-ն, ԵԱՀԿ-ն, Արաբական պետությունների լիգան, Եվրամիությունը:

Իր հերթին Վլադիմիր Մակեյը նշել է, որ «ԵԱՏՄ-ում Բելառուսի նախագահության ժամանակաշրջանում արվել է առավելագույնը»: «Մենք առաջինն ստանձնեցինք այդ պատասխանատու գործառույթը, մեր առջև ծառացել էր ոչ միայն գործողությունների ակտուալ ծրագիր առաջարկելու, այլև նախագահության ավանդույթների հիմքը դնելու խնդիրը,-հավելել է նա:-Մեր առաջարկությունները պրագմատիկ, կոնկրետ բնույթ են կրում: Մասնավորապես, դա վերաբերում է համաձայնեցված արդյունաբերական քաղաքականության իրականացմանը, արտահանմանը, արդյունաբերական կոոպերացիային, ներմուծման փոխարինմանը, ներդրումային նախագծերին»: «Ընդհանուր առմամբ մենք գոհ ենք մեր գործընկերների հետ փոխգործակցությունից,- ընդգծել է Մակեյը:-Նշում ենք կառուցողական մոտեցումը ԵԱՏՄ-ի բոլոր անդամների նախաձեռնությունների նկատմամբ: ԵԱՏՄ-ի հանձնաժողովը հաջողությամբ է կատարում գործողությունների այն ծրագիրը, որը նպատակամղված է Բելառուսի նախագահության նախաձեռնությունների իրագործմանը: Մենք բավարարված ենք հանձնաժողովի աշխատանքից և մեր գործընկերների հետ փոխհարաբերություններից»:

Ինչ վերաբերում է ԵԱՏՄ-ի միջազգային գործունեությանը, Բելառուսի ԱԳ նախարարը նշել է, որ «այստեղ անհրաժեշտ է գործել ավելի ակտիվորեն»: «Կարծում ենք, որ Լիսաբոնից մինչև Վլադիվոստոկ միասնական տնտեսական տարածքի ստեղծման հեռանկարն ակտուալ է: Չի կարելի արհեստականորեն արագացնել իրադարձությունները: Մենք պատրաստ ենք փորձագիտական մակարդակով և այլ մակարդակներով խոսել այդ գաղափարի առաջշարժման շուրջ»,- նշել է Մակեյը:

«Այսօր օրակարգում է ՄԱԿ-ի Գլխավոր ասամբլեայում ԵԱՏՄ-ին դիտորդի կարգավիճակ շնորհելու հարցը: Համապատասխան խնդրանքը ԵԱՏՄ-ի բոլոր պետությունների կողմից ուղարկվել է ՄԱԿ-ի քարտուղարություն, պատրաստվում են համապատասխան նյութեր, որոնք կուղարկվեն ՄԱԿ: Համոզված ենք, որ ընթացիկ տարվա աշնանը ՄԱԿ-ի հոբելյանական նստաշրջանում ԵԱՏՄ-ն կստանա այդ կարգավիճակը: Պլանավորում ենք հաջորդ տարի մեր գործընկերների հետ միասին աշխատել ԵԱՏՄ-ի և ՄԱԿ-ի միջև համագործակցության կազմակերպման վերաբերյալ ՄԱԿ-ի Գլխավոր ասամբլեայի բանաձևի վրա»,- տեղեկացրել է Մակեյը: Նրա խոսքով՝ «դա թույլ կտա էլ ավելի բարձրացնել մեր կազմակերպության իմիջն ու հեղինակությունը և կցրի մի քանի նախապաշարումներ, որոնք մեր գործընկերները դեռևս ունեն ԵԱՏՄ-ի նկատմամբ»: