Հարավային Կորեայում 357 մլն դոլար օգնություն կհատկացնեն կորոնավիրուսից տուժած ընկերություններին

Կորեայի Հանրապետության (ԿՀ) կառավարությունը 400 մլրդ վոն (357 մլն դոլար) կհատկացնի մերձավորարևելյան շնչառական համախտանիշի կորոնավիրուսի (MERS) բռնկումից վնասներ կրող ձեռնարկություններին աջակցելու միջոցառումներին: Այդ մասին, ինչպես տեղեկացնում Է «Արմենպրես»-ը, Սեուլում հայտնել Է պլանավորման և ֆինանսների նախարար Չոյ Հյոն Հվանը, որը ներկայում նաև վարչապետի պաշտոնակատարն Է:

«Կառավարությունը լրացուցիչ միջոցներ կձեռնարկի տնտեսության այն ճյուղերը խթանելու համար, որոնք դրա կարիքն ունեն»,-ընդգծել Է նա: Նրա խոսքով՝ իշխանություններն ուսումնասիրում են, թե վիրուսն ինչ վնաս Է հասցրել փոքր բիզնեսին: Այդ գործընթացը կավարտվի մինչև հունիսի 12-ը, ինչից հետո կսկսվի միջոցների հատկացումը առավել շատ տուժած ձեռնարկություններին՝ ոչ մեծ մանրածախ խանութներին, մասնավոր կլինիկաներին, տուրիստական ֆիրմաներին և այլ ընկերությունների, որոնք վարակի տարածման պատճառով մնացել են առանց հաճախորդների:

Վիճակագրական տվյալների համաձայն՝ հունիսի առաջին շաբաթվա ընթացքում երկրի խոշոր սուպերմարկետներում վաճառքի ծավալներն ընկել են 16,5 տոկոսով, իսկ ոչ մեծ խանութներում՝ 25 տոկոսով:

Չոյ Հյոն Հվանը հայտնել Է, որ իշխանությունները շտապ ֆինանսական օգնություն կցուցաբերեն այն մարդկանց, որոնք շփվել են հիվանդների հետ և այժմ գտնվում են տնային կարանտինի տակ:

Վարչապետի պաշտոնակատարի խոսքով՝ կառավարությունն հնարավոր ամեն ինչ անում Է, որպեսզի MERS-ի տարածումը կանգնեցնի արդեն մինչև ընթացիկ շաբաթվա վերջը, և ամեն տեսակ օգնություն կտրամադրի այն մարդկանց, ովքեր դրա կարիքն ունեն:

Անցած օրվա ընթացքում Կորեայի Հանրապետությունում ևս երկու մարդ է մահացել մերձավորարևելյան շնչառական համախտանիշի կորոնավիրուսի հարուցած բարդացումներից: Այդպիսով, երկրում հիվանդության զոհերի թիվը հասել է իննի: Ինչպես հաղորդել է ԿՀ-ի առողջապահության և սոցիալական ապահովության նախարարությունը, մահացու վտանգավոր հիվանդությամբ վարակվածների թիվն ավելացել է 13-ով և հասել 108-ի: Տնային կարանտինի տակ է 2900 մարդ:

Հարավային Կորեայի նախագահը Պակ Կին Հեն կորոնավիրուսի բռնկման պատճառով չեղյալ է հայտարարել այցն ԱՄՆ, որը պլանավորված էր հաջորդ շաբաթ:

Կորոնավիրուսով հիվանդանալու առաջին դեպքը Հարավային Կորեայի տարածքում գրանցվել է մայիսի 20-ին: Պարզվել է, որ վիրուսը, որը տարածվում է օդակաթիլային ճանապարհով, բերվել է ԿՀ-ի քաղաքացու կողմից, որը վերադարձել էր Մերձավոր Արևելքի երկրներ կատարած ուղևորությունից:

Կորոնավիրուսն առաջին անգամ մարդու մոտ բացահայտվել է 2012 թվականին Սաուդյան Արաբիայում: Դրանով վարակվելու դեպքեր են գրանցվել Հորդանանում, Քատարում, Արաբական Միացյալ Էմիություններում, Թունիսում, Մեծ Բրիտանիայում, Գերմանիայում, Իտալիայում, Ֆրանսիայում, ընդամենը 23 երկրներում, որտեղ պաշտոնապես հաստատվել է մարդկանց վարակվելու ավելի քան 1100 դեպք, որոնց 40 տոկոսը մահացու ելք է ունեցել:

Հիվանդությունն սկսվում է որպես սովորական շնչառական ինֆեկցիա, որն ուղեկցվում է տենդով, հազով ու թոքաբորբով, բայց արագորեն ծանր ընթացք է ստանում՝ խոցելով թոքերը, հաղորդել Է ՏԱՍՍ-ը: