Լոնդոնը Եվրամիությանը թույլ չի տա կառավարել իր տնտեսությունը. Ջորջ Օսբոռն

Մեծ Բրիտանիան Եվրամիությանը թույլ չի տա տնտեսության հարցերում «իր կամքը թելադրել իրեն»: Միության հետ հարաբերությունների շուրջը կայանալիք հանրաքվեի նախաշեմին այս մասին հայտարարել է թագավորության ֆինանսների նախարար Ջորջ Օսբոռնը, տեղեկացնում է «Արմենպրես»-ը:

Նրա խոսքով՝ ԵՄ-ի հետ հարաբերությունների պահպանման «ո՛չ կողմնակիցները, ո՛չ էլ հակառակորդները» չպետք է կասկածեն Լոնդոնի ֆինանսական անկախության հարցում: «Մեծ Բրիտանիան ձգտելու է հասնել միությունում իր դերի վերանայման, որպեսզի արդարացի հավասարակշռության հասնի (տնտեսական հարաբերություններում) այն պետությունների միջև, որոնք մտնում են եվրոյի գոտու մեջ և դրա անդամները չեն»,- հայտնել է Օսբոռնը:

Նախարարը նաև հայտարարել է, որ Լոնդոնը պատրաստ է պաշտպանել եվրագոտու հետագա ինտեգրացումը: Այնուամենայնիվ, դրա համար ԵՄ-ն պետք է կատարի մի շարք պայմաններ, մասնավորապես, հասնելով «արդարացի միասնական շուկայի»:

Ինչպես նշում է ՏԱՍՍ-ը, փորձելով հաղթահարել ֆինանսական ճգնաժամի հետևանքները՝ ԵՄ-ն պատրաստվում է սկսել ինտեգրացման նոր փուլ, որի նպատակն է մշակել միասնական տնտեսական քաղաքականություն և ստեղծել եվրոգոտու երկրների ֆեդերալ տնտեսական կառավարություն:

Սակայն Լոնդոնը չի պատրաստվում համապատասխան լիազորությունները հանձնել միության կենտրոնական կառույցներին: Դեռ ավելին, Մեծ Բրիտանիան մտադիր է դուրս գալ Եվրամիության գործունեության մի շարք ընդհանուր ոլորտներից, որպեսզի ուժեղացնի ազգային խորհրդարանի դիրքերը: Թագավորությունը ցանկանում ԵՄ-ի միասնական տնտեսական գոտու մաս կազմել, սակայն մյուս բոլոր ոլորտները թողնել Մեծ Բրիտանիայի խորհրդարանի իրավասությանը: