Հետխորհրդային տարածքում ինտեգրացումն անխուսափելի է. Մեդվեդև

Ռուսաստանի վարչապետ Դմիտրի Մեդվեդևն այն կարծիքին է, որ հետխորհրդային տարածքում ինտեգրացումն անխուսափելի է: Այդ մասին նա հունիսի 11-ին հայտարարել է Ռուսական մամուլի համաշխարհային կոնգրեսում, տեղեկացնում է «Արմենպրես»-ը՝ հղում անելով ՌԻԱ Նովոստիին:

«Ես վստահ եմ, որ մեր հետխորհրդային տարածքում ինտեգրացումն անխուսափելի է, բայց, ամենագլխավորը, այն հսկայական առավելություններ է խոստանում մեր ժողովուրդներին»,-ասել է Մեդվեդևը:

ՌԴ-ի վարչապետը հերքել է արևմտյան ԶԼՄ-ների պնդումներն այն մասին, որ Ռուսաստանի ղեկավարները ցանկանում են վերածնել խորհրդային կայսրությունը: «Մենք գիտենք, թե ինչպես է օտարերկրյա հրատարակություններում նկարագրվում Եվրասիական տնտեսական միության ստեղծումը, որ դա Ռուսաստանի կողմից պարտադրված խորհրդային սխեմա է, որ Ռուսաստանի ղեկավարները քնում են և տեսնում, թե ինչպես վերածնել Խորհրդային Միությունը, որպեսզի պարտադրեն իրենց կարգերը: Դա անհեթեթություն է, դա հնարավոր չէ»,-ասել է Մեդվեդևը:

«Հետխորհրդային տարածքում նորմալ ինտեգրացումն սկսվել է Մաքսային միության ստեղծումից. դա է հենց իսկական ինտեգրացումը,-հայտարարել է վարչապետը:-Ակներև է, որ լիարժեք տնտեսական ինտեգրացումն ուղեկցվելու է քաղաքական գործընթացներով, քաղաքական ինտեգրացմամբ»:

Ինչ վերաբերում է նախկին խորհրդային հանրապետությունների մերձենալու տեմպերին, նա ասել է. «Ինտեգրացման տեմպերը կախված է բուն երկրներից, նրանց ղեկավարներից: Ես կարծում եմ, որ մենք վերջին տարիների ընթացքում հսկայական աշխատանք ենք կատարել, հատկապես նկատի առնելով գործերի վիճակը ինտեգրացիոն մյուս միավորումներում»: