Կապել ես գլխաշորը` ստիպված ես ամուսնանալ. Ղազախստանում «վերականգնում են հին ավանդույթները» (տեսանյութ)

Ղազախստանում շարունակում են առևանգել երիտասարդ աղջիկներին և բռնի ուժով ամուսնացնել: Համապատասխան տեսանյութն իր ֆեյսբուքյան էջում տեղադրել է «Խաբար» գործակալության լրագրող Բաուրժան Օրդան, հայտնում է Корреспондент-ը:

Տեսանյութում երևում է, թե ինչպես են մի երիտասարդ աղջկա ստիպում կրել գլխաշոր: Աղջիկը փորձում է դիմադրել և բղավում է, սակայն տղամարդուն և կնոջը հաջողվում է հագցնել գլխաշորը նրա գլխին, ինչից հետո նա հանգստանում է:

Բաուրժան Օրդան ասել է, որ ստացել է տեսանյութը WhatsApp-ի միջոցով և չի կարողանում հաստատել, թե որտեղ և երբ է այն նկարահանվել:

«Дождь» հեռուստաալիքը խնդրել է լրագրողին բացատրել, թե ինչ է տեղի ունենում տեսանյութում: Նրա խոսքով՝ գլխաշոր գցելը ծեսի մի մասն է, որը սկսվում է հարսնացուի առևանգումից: Գլխաշորը նշանակում է, որ աղջիկը համակերպվել է այն բանի հետ, որ իրեն բռնությամբ ամուսնացնում են: Ծեսերից մեկն էլ կոչվում է «շոշու»` աղջկա վրա կոնֆետներ են լցնում:

Հեռուստաալիքի լրագրող Կոգերշին Սագիևը նշում է, որ հոլովակի զրույցներից ենթադրվում է, որ տղան և աղջիկը ծանոթ են եղել, սակայն դա կարող է լինել պատահական կամ նույնիսկ հեռակա ծանոթություն: Աղջիկը կարող էր պատահաբար հայտնվել այդ տանը կամ, միգուցե, նրան խաբեությամբ են բերել այդ բնակարան: Հնարավոր է՝ տղան և աղջիկը հարաբերություններ են ունեցել, և նրանց բարեկամները որոշել են հարսանիք կազմակերպել: Սցենարները կարող են տարբեր լինել:

«Եթե հարսնացուն գլխաշորը կապելուց հետո, միևնույն է, հրաժարվում է հարսանիքից, նա և նրա ընտանիքը խայտառակվում են: Եվ եթե աղջկա գլխին գլխաշոր գցել չի լինում, ապա կիրառում են վերջին տարբերակը. դռան մոտ պառկում է ընտանիքի ամենատարեց կինը: Եթե առևանգված աղջիկն անցնում է նրա վրայով, ապա այդ ժամանակ հաստատ խայտառակվում է նրա ամբողջ ընտանիքը: Սակայն լինում են նաև դեպքեր, երբ աղջկա ծնողներին չեն հետաքրքրում նման «ավանդույթները», և նրանք գնում են «փեսայի» տան վրա «հարձակվելու»»,- պատմել է ղազախ լրագրող Մաքսիմ Կալաչը: