Իրանի և ՌԴ-ի համագործակցությունն այժմ ավելի անհրաժեշտ է, քան երբևէ. Ռոուհանի

Իրանի և Ռուսաստանի բազմակողմանի համագործակցությունն այժմ ավելի անհրաժեշտ է, քան երբևէ: Ինչպես տեղեկացնում է «Արմենպրես»-ը, այս հայտարարությունը տեղ է գտել Իրանի Իսլամական Հանրապետության նախագահ Հասան Ռոուհանիի՝ Ռուսաստանի օրվա տոնակատարության կապակցությամբ ՌԴ նախագահ Վլադիմիր Պուտինին հասցեագրված ուղերձում: Ուղերձի տեքստը հրապարակված է Իրանի նախագահի կայքում:

«Կարծում եմ, որ տարածաշրջանում և աշխարհում տիրող ներկայիս իրադրության մեջ, ինչպես նաև հաշվի առնելով բազմաթիվ հարցերում երկու երկրի տեսակետների ընդհանրությունը, Իրանի Իսլամական Հանրապետության և Ռուսաստանի համագործակցությունն ավելի անհրաժեշտ է, քան երբևէ»,- ասված է շնորհավորական ուղերձում:

Առողջություն և հաջողություններ մաղթելով ՌԴ-ի նախագահին, ինչպես նաև բարգավաճում՝ Ռուսաստանի ժողովրդին, Հասան Ռոուհանին ընդգծել է. «Ինչ վերաբերում է տարբեր բնագավառներում մեր երկրների միջև փոխանակմանը, ապա մենք ակնկալում են երկկողմ և բազմակողմ համագործակցության հետագա ընդլայնում»:

Հունիսի 12-ին նշվում է Ռուսաստանի օրը՝ երկրի գլխավոր պետական տոնը: 1990 թվականի այդ օրը ՌԽՖՍՀ ժողովրդական պատգամավորների համագումարն ընդունեց Պետական իշխանության մասին հռչակագիրը: Ուղիղ մեկ տարի անց՝ հունիսի 12-ին, ընտրվեց Ռուսաստանի առաջին նախագահ Բորիս Ելցինը: 1991 թվականի դեկտեմբերին ԽՍՀՄ-ը դադարեցրեց գոյությունը, դեկտեմբերի 25-ին ընդունվեց պետության նոր անվանումը՝ Ռուսաստանի Դաշնություն (Ռուսաստան), որը դարձավ պատմություն դարձած խորհրդային պետության իրավահաջորդը:

1994 թվականից հունիսի 12-ը նշվում էր որպես Ռուսաստանի պետական ինքնիշխանության մասին հռչակագրի ընդունման օր: Տոնը Ռուսաստանի օր սկսեց կոչվել 2002 թվականից: Այդ օրը, ավանդույթի համաձայն, Կրեմլում հանձնվում են գիտության ու տեխնոլոգիաների, գրականության ու արվեստի, ինչպես նաև հումանիտար գործունեության բնագավառներում ՌԴ-ի պետական մրցանակները, հաղորդել է ՏԱՍՍ-ը: