Վրաստանի նախագահը ներում է շնորհել 226 դատապարտյալի

Վրաստանի նախագահ Գեորգի Մարգվելաշվիլին ներում է շնորհել 226 դատապարտյալների, որոնցից 180-ը ազատ կարձակվեն հունիսի 12-ին: Այդ մասին, ինչպես տեղեկացնում է «Արմենպրես»-ը, Թբիլիսիում կայացած մամուլի ասուլիսում հայտարարել է համաներման հարցերով զբաղվող հանձնաժողովի նախագահ Զվիադ Քորիձեն:

«Համաներման հարցերի հանձնաժողովն աշխատել է հունիսի 1-ից մինչև 6-ը և քննել է 1329 անձանց գործ: Վրաստանի նախագահը ներում է շնորհել 226 դատապարտյալի»,-ասել է նա:

Քորիձեի խոսքով՝ համաներման արժանացածների ընդհանուր թվում 46-ի նկատմամբ մեղմացվել է պատիժը:

Վրաստանի նախագահի կողմից հրապարակված Համաներման մասին ակտն ուղարկվել է պատիժների իրագործման և պրոբացիայի նախարարության համապատասխան դեպարտամենտ, հաղորդել է Sputnik-ը: