Ուկրաինան ներդրումային խորհրդաժողով է անցկացնելու ԱՄՆ-ում. Յացենյուկ

Ուկրաինան հուլիսի 13-ին ներդրումային խորհրդաժողով կանցկացնի ԱՄՆ-ում: Այդ մասին, ինչպես տեղեկացնում է «Արմենպրես»-ը, կառավարության հունիսի 12-ի նիստում հայտնել է հանրապետության վարչապետ Արսենի Յացենյուկը: «Մենք կանցկացնենք ներդրումային խորհրդաժողով, որին կմասնակցեն ամերիկյան ընկերությունների 130-ից ավելի ներկայացուցիչներ»,-ասել է Յացենյուկը:

Նա հանձնարարել է տնտեսական զարգացման և առևտրի նախարարին՝ «պատշաճ մակարդակով» նախապատրաստվել ԱՄՆ-ում կայանալիք համաժողովին: «Մենք մտադիր ենք ներգրավել ներդրողների միջոցները և երաշխիքներ տալ օտարերկրյա այդ ներդրողներին, որ մեր երկրում բիզնեսի վարման կանոնները փոխվել են, որ ներդրումային մրցույթները բաց են անցկացվում»,-ընդգծել է Յացենյուկը:

Ուկրաինայի վարչապետը նաև հայտարարել է, որ իր երկիրը չի կարող սպասարկել 40 մլրդ դոլարի պարտքերը, որոնք վերցվել են Վիկտոր Յանուկովիչի նախագահության տարիներին: «Մենք չենք կարող սպասարկել Յանուկովիչի պարտքերը: Դա մի գումար է, որը մենք ծախսում ենք երկրի արևելքի իրադրության կապակցությամբ»,-ասել է վարչապետը:

Նրա խոսքով՝ այդ տեղեկատվությունն ինքը հայտնել է Ուկրաինայի վարկատուներին: «ԱՄՆ այցի ժամանակ ֆինանսների նախարար Նատալյա Յարեսկոյի հետ մենք այդ մասին խոսել ենք մեր վարկատուների հետ: Այդ պարտային լուծը պետք է վերակառուցվի»,-ընդգծել է Յացենյուկը: «Մենք այդ պարտքերը չեն մարել ուկրաինացիների գրպանների հաշվին», հավելել է նա, հաղորդել է ՏԱՍՍ-ը: