Բրիտանացի հարյուրից ավելի պահպանողական է միավորվել «ԵՄ-ից դուրս գալու նախապատրաստման» խմբում

Եվրամիությանը Մեծ Բրիտանիայի հետագա անդամակցման հարցի շուրջը հանրաքվեի նախապատրաստման և անցկացման ընթացակարգը պառակտում է մտցրել կառավարող Պահպանողական կուսակցության շարքերում: Ինչպես հաղորդել է Daily Mail թերթի էլեկտրոնային տարբերակը, ավելի քան հարյուր պահպանողական պատգամավորներ միավորվել են «ԵՄ-ից դուրս գալու նախապատրաստման» խմբում, տեղեկացնում է «Արմենպրես»-ը:

Հրատարակության տվյալներով՝ Պահպանողական կուսակցությունից եվրասկեպտիկ պատգամավորները պատրաստ են հանդես գալու հանրահարցումից առաջ ԵՄ-ի պաշտպանության քարոզչության ընթացքում բյուջետային միջոցների օգտագործման արգելքը վերացնելու՝ վարչապետ Դևիդ Քեմերոնի պլանի դեմ: Եվրասկեպտիկ պահպանողական և շրջակա միջավայրի հարցերի նախկին քարտուղար Օուեն Փատերսոնը համոզված է, որ նախարարների կաբինետի անդամները «կաջակցեն պահպանողականների աճող խմբին», որը պաշտպանում է բրիտանական շահերը:

The Daily Telegraph-ը նշում է, որ «ըմբոստացած պատգամավորները» պահանջում են երկու կողմերի համար էլ արդարացի հանրաքվե: Նրանք պնդում են, որ ուղղումներ մտցվեն հանրաքվեի անցկացման օրինագծում, որոնք կառավարությանը թույլ չեն տա «եվրոպամետ զեկույցներ հրապարակել քվեարկության նախօրեին»:

Հանրահարցումն, ինչպես խոստանում է Մեծ Բրիտանիայի վարչապետը, պետք է տեղի ունենա 2017 թվականի վերջին, սակայն բացառված չէ, որ քվեարկությունը կազմակերպվի արդեն հաջորդ տարի, հաղորդել է ՏԱՍՍ-ը: